വെല്ലിങ്ടണ്‍: കൊവിഡ് മുക്തമായി പ്രഖ്യാപിച്ച ന്യൂസിലന്‍ഡില്‍ വീണ്ടും രോഗം സ്ഥിരീകരിച്ചതായി റിപ്പോര്‍ട്ട്. ബ്രിട്ടനില്‍ നിന്ന് മടങ്ങിയെത്തിയ രണ്ടുപേര്‍ക്കാണ് രോഗം സ്ഥിരീകരിച്ചത്. കഴിഞ്ഞയാഴ്ചയാണ് കൊവിഡ് പ്രതിസന്ധിയെ തുടര്‍ന്ന് പ്രഖ്യാപിച്ച നിയന്ത്രണങ്ങള്‍ രാജ്യത്തുനിന്നും ഒഴിവാക്കിയത്. കൊവിഡിനെ പൊരുതി തോല്‍പ്പിച്ച ആദ്യ രാജ്യമായി ന്യൂസിലാന്‍ഡ് അറിയപ്പെട്ടിരുന്നു. 24 ദിവസത്തോളം പുതുതായി കൊവിഡ് റിപ്പോര്‍ട്ട് ചെയ്യാതിരുന്ന സാഹചര്യത്തില്‍ രാജ്യം കൊവിഡ് മുക്തമായി പ്രഖ്യാപിച്ചിരുന്നു. തുടര്‍ന്നാണ് രാജ്യത്തെ എല്ലാ സാമൂഹിക സാമ്പത്തിക നിയന്ത്രണങ്ങളും എടുത്തുകളഞ്ഞത്. 

മറ്റു രാജ്യങ്ങളില്‍ നിന്നുള്ള ന്യൂസിലന്‍ഡുകാര്‍ രാജ്യത്തേക്ക് മടങ്ങിയെത്തുമ്പോള്‍ ഭാവിയില്‍ പുതിയ കേസുകള്‍ റിപ്പോര്‍ട്ടു ചെയ്യാന്‍ സാധ്യതയുണ്ടെന്ന് പ്രധാനമന്ത്രി ജസീന്ത ആര്‍ഡേണ്‍ മുന്നറിയിപ്പ് നല്‍കിയിരുന്നു. രോഗം സ്ഥിരീകരിച്ച രണ്ടുപേരും ഈ മാസം ഏഴിന് ദോഹ, ബ്രിസ്ബന്‍ വഴിയാണ് ന്യൂസിലന്‍ഡിലെത്തിയത്. നിലവില്‍ ഇവര്‍ ഓക്ലാന്‍ഡിലെ ആശുപത്രിയില്‍ നിരീക്ഷണത്തിലാണ്. ഇതോടെ രാജ്യത്ത് റിപ്പോര്‍ട്ട് ചെയ്യപ്പെട്ട മൊത്തം കേസുകളുടെ എണ്ണം 1,506 ആയി. ഇതുവരെ 22 പേരാണ് കൊവിഡ് ബാധിച്ച് മരിച്ചത്.

അതിനിടെ ലോകത്താകെ കൊവിഡ് ബാധിച്ചവരുടെ എണ്ണം 80 ലക്ഷം കടന്നു. 4,35,000 പേര്‍ മരിക്കുകയും ചെയ്തു. കൊവിഡിന്റെ രണ്ടാം വരവ് സംശയിക്കുന്ന ചൈനയില്‍ ഇന്നലെ 27 പേര്‍ക്കു കൂടി രോഗം സ്ഥിരീകരിച്ചു.