കല്‍പ്പറ്റ: ഹൈറേഞ്ച് റൂറല്‍ ഡവലപ്‌മെന്റ് സൊസൈറ്റിയുടെ 'സദ്ഗ്രഹ' പദ്ധതിയുടെ ഭാഗമായി ജില്ലയിലെ ആദിവാസി വിഭാഗങ്ങള്‍ക്ക് 504 വീടുകള്‍ നിര്‍മിക്കുമെന്ന് സെക്രട്ടറി അജികൃഷ്ണന്‍ വാര്‍ത്താ സമ്മേളനത്തില്‍ അറിയിച്ചു. ആദ്യഘട്ടമായി പൊഴുതന സുഗന്ധഗിരിയില്‍ പൂര്‍ത്തിയായ മൂന്ന് വീടുകളുടെ താക്കോല്‍ദാനം വ്യാഴാഴ്ച ജില്ലാ ജഡ്ജി ഡോ. വി. വിജയകുമാര്‍ നിര്‍വഹിക്കും.
ഏത് കാലാവസ്ഥയെയും തീപിടിത്തം പോലുള്ള അത്യാഹിതങ്ങളെയും അതിജീവിക്കുന്ന സാങ്കേതിക വിദ്യയില്‍ ഫൈബര്‍സിമന്റ് പാനല്‍ ഉപയോഗിച്ചുള്ള പ്രീ ഫാബ്രിക്കേറ്റഡ് വീടുകളാണ് നിര്‍മിച്ചിരിക്കുന്നത്. വീടുകള്‍ക്ക് പത്ത് വര്‍ഷത്തെ അറ്റകുറ്റപ്രവൃത്തികളും ചെയ്യും. വീടിനൊപ്പം കുടുംബത്തിനാവശ്യമായ ഫര്‍ണിച്ചറുകളും പാത്രങ്ങളും നല്‍കും. സുഗന്ധഗിരിയില്‍ പൂര്‍ത്തിയായ മൂന്ന് വീടുകളുടെ താക്കോല്‍ദാനമാണ് ഇന്ന് രാവിലെ ഒന്‍പതിന് നടക്കുക. വാര്‍ത്താസമ്മേളനത്തില്‍ സി.വി വിവേകാനന്ദന്‍, ഡോ. ബി രഘുനാഥ്, ജോയ്മാത്യു, പി സുദേവന്‍ എന്നിവരും പങ്കെടുത്തു.