തലശേരി: സി.പി.എം നേതാക്കള്‍ ചാനല്‍ ചര്‍ച്ചക്കിടെ അവഹേളിച്ചതിനെ തുടര്‍ന്ന് കുട്ടിമാക്കൂലില്‍ ദലിത് യുവതി ആത്മഹത്യയ്ക്കു ശ്രമിച്ച സംഭവത്തില്‍ ചര്‍ച്ചയുടെ ക്ലിപ്പിങുകള്‍ പൊലിസ് ശേഖരിച്ചു. കുട്ടിമാക്കൂലിലെ കോണ്‍ഗ്രസ് നേതാവ് കുനിയില്‍ രാജന്റെ മകള്‍ അഞ്ജനയാണ് എ.എന്‍ ഷംസീര്‍ എം.എല്‍.എ, ജില്ലാ പഞ്ചായത്ത് വൈസ് പ്രസിഡന്റ് പി.പി ദിവ്യ എന്നിവര്‍ നടത്തിയ അവഹേളനത്തെ തുടര്‍ന്ന് ആത്മഹത്യയ്ക്കു ശ്രമിച്ചത്. ഏഷ്യാനെറ്റ്, മനോരമ ചാനലുകളിലാണ് നേതാക്കള്‍ കുടുംബത്തെ അവഹേളിച്ചെന്നു പരാതി ഉയര്‍ന്നത്. ഈ രണ്ട് പരിപാടികളുടെയും ക്ലിപ്പിങുകളാണ് പൊലിസ് ശേഖരിച്ചു പരിശോധന നടത്തുന്നത്.എ.എന്‍.ഷംസീര്‍ എം.എല്‍.എക്കെതിരേയും ജില്ലാ പഞ്ചായത്ത് വൈസ് പ്രസിഡന്റ് പി.പി ദിവ്യക്കെതിരേയും ആത്മഹത്യാ പ്രേരണയ്ക്കു തലശേരി പൊലിസ് കേസെടുത്തിരുന്നു. തലശേരി ഡിവൈ.എസ്.പി സാജുപോളിന്റെ നേതൃത്വത്തിലുള്ള സംഘമാണ് കേസ് അന്വേഷിക്കുന്നത്.