കൊച്ചി: എറണാകുളം ലോക്‌സഭാ മണ്ഡലത്തിലെ എല്‍.ഡി.എഫ് സ്ഥാനാര്‍ഥി പി.രാജീവ് ഇന്ന് നാമനിര്‍ദേശ പത്രിക സമര്‍പ്പിക്കും. യു.ഡി.എഫ് സ്ഥാനാര്‍ഥി ഹൈബി ഈഡന്‍ ഏപ്രില്‍ ഒന്നിനാണ് പത്രിക സമര്‍പ്പിക്കുന്നത്. ഉച്ചക്ക് 12.05നും 12.30നും മധ്യേയാണ് പത്രിക സമര്‍പ്പിക്കുക. പി.രാജീവ് രാവിലെ 11ന് വരണാധികാരിയായ ജില്ലാ കലക്ടര്‍ മുമ്പാകെയാണ് പത്രിക സമര്‍പ്പിക്കുക.
വൈകിട്ട് ആറിന് എറണാകുളം പാര്‍ലമെന്റ് മണ്ഡലത്തിലെ ഇടതു മുന്നണിയുടെ പ്രകടന പത്രിക തയാറാക്കുന്നതിന് മുന്നോടിയായി സമൂഹത്തിലെ വിവിധ മേഖലകളില്‍ നിന്നുള്ള വിദഗ്ധരുടെ ചര്‍ച്ചാ യോഗത്തില്‍ പി. രാജീവ് പങ്കെടുക്കും. ഐ.എം.എ ഹാളില്‍ നടക്കുന്ന യോഗത്തില്‍ മന്ത്രി പ്രൊഫ.സി രവീന്ദ്രനാഥ് പങ്കെടുക്കും. ചര്‍ച്ചകളില്‍ ഉയര്‍ന്നു വരുന്ന അഭിപ്രായങ്ങള്‍ ക്രോഡീകരിച്ചായിരിക്കും പ്രകടന പത്രികക്ക് അന്തിമ രൂപം നല്‍കുക.
ഹൈബി ഈഡന്‍ പത്രിക സമര്‍പ്പണത്തിനു ശേഷം വൈകുന്നേരം അഞ്ച് മണിയോടെ വാഹന പ്രചരണ ജാഥ ആരംഭിക്കും. പറവൂര്‍ നിയോജക മണ്ഡലത്തിലെ മൂത്തകുന്നത് മുന്‍ കെ.പി.സി.സി പ്രസിഡന്റ് വി.എം സുധീരന്‍ ജാഥ ഉദ്്ഘാടനം ചെയ്യും.
ചാലക്കുടി നിയോജക മണ്ഡലത്തിലെ ഇടതുപക്ഷ ജനാധിപത്യ മുന്നണി സ്ഥാനാര്‍ഥി ഇന്നസെന്റും ഇന്ന് നാമനിര്‍ദേശ പത്രിക സമര്‍പ്പിക്കും. രാവിലെ 11നാണ് വരണാധികാരിയായ എറണാകുളം ജില്ലാ കലക്ടര്‍ മുഹമ്മദ് വൈ സഫീറുള്ളയ്ക്കാണ് പത്രിക സമര്‍പ്പിക്കുന്നത്.