കാട്ടാക്കട: ഡി.വൈ.എഫ്.ഐ മണ്ണടികോണം യൂനിറ്റ് സെക്രട്ടറി സതീഷ് കുമാറിനെ തലക്കടിച്ച് വീഴ്ത്തി കൊലപ്പെടുത്താന്‍ ശ്രമിക്കുകയും രണ്ട് പവന്‍ സ്വര്‍ണമാല പിടിച്ചു പറിക്കുകയും ചെയ്ത കേസില്‍ മൂന്നു പേര്‍ പൊലിസ് പിടിയില്‍.
മഞ്ഞറമൂല ഞാറവിള പുത്തന്‍വീട്ടില്‍ അമല്‍ദേവ്, മണ്ണടികോണം അമ്പലത്തിന്‍ വിള വീട്ടില്‍ വിഷ്ണു, മഞ്ഞറമൂല ശാസ്താംകുറ്റി കിഴക്കുംകര വീട്ടില്‍ ശ്രീജിത്ത് എന്നിവരാണ് പിടിയിലായത്. ജൂണ്‍ 23 ശനിയാഴ്ച രാത്രി ഒന്‍പത് മണിയോടെ സി.പി.എം ബ്രാഞ്ച് കമ്മിറ്റി കഴിഞ്ഞ് വീട്ടിലേക്ക് പോകുംവഴി മണ്ണടികോണം ചാനല്‍ പാലത്തിന് സമീപം വച്ചാണ് നാല് ആര്‍.എസ്.എസുകാര്‍ സതീഷിനെ ആക്രമിച്ചത്. തുടര്‍ന്ന് ഏറെ നേരം മാരകയുധങ്ങളുമായി സംഘം പ്രദേശത്ത് ഭീകരാന്തരീക്ഷം സൃഷ്ടിക്കുകയും ചെയ്തു. തലക്ക് മാരകമായി പരുക്കേറ്റ സതീഷിനെ ആശുപത്രിയില്‍ പ്രവേശിപ്പിച്ചിരുന്നു. അക്രമത്തിന് ശേഷം തമിഴ്‌നാട്ടിലേക്ക് കടന്ന അക്രമി സംഘം കീരിപ്പാറ എന്ന സ്ഥലത്തുള്ള മുത്തൂറ്റ് ഗ്രൂപ്പ് വക ആയിരത്തി അഞ്ഞൂറ് ഏക്കര്‍ വരുന്ന എസ്റ്റേറ്റിനുള്ളില്‍ ഒളിവില്‍ കഴിഞ്ഞു വരികയായിരുന്നു. മാറനല്ലൂര്‍ എസ്.ഐ സഫീറിന്റെ നേതൃത്വത്തിലുള്ള സംഘം ഇവിടെ നിന്നും മൂന്ന് പ്രതികളെ പിടികൂടുകയായിരുന്നു.
ശരത് എന്ന ഒരു പ്രതി കാടിനുള്ളിലേക്ക് ഓടി രക്ഷപ്പെട്ടു. അറസ്റ്റിലായ പ്രതികള്‍ മുന്‍പും കഞ്ചാവ് വില്‍പന ഉള്‍പ്പടെ നിരവധി ക്രിമിനല്‍ കേസുകളില്‍ പ്രതിയാണ്. കാട്ടാക്കട കോടതിയില്‍ ഹാജരാക്കിയ പ്രതികളെ റിമാന്‍ഡ് ചെയ്തു.