ആളൂര്‍: ഈ മാസം 25ന് ആളൂര്‍ പെട്രോള്‍ പമ്പിന് സമീപത്തുണ്ടായ വാഹനാപകടത്തില്‍ സ്ത്രീ മരിക്കാനിടയായ സംഭവത്തില്‍ ബൈക്ക് യാത്രികന്‍ അറസ്റ്റില്‍.
കുഴിക്കാട്ടുശ്ശേരി ഉറവത്തും പീടിക മുരിങ്ങലത്ത് വീട്ടില്‍ ബിവിനെ(23) ആളൂര്‍ എസ്.ഐ എന്‍.എസ് രാജിവ് അറസ്റ്റ് ചെയ്യുകയും വാഹനം കസ്റ്റഡിയിലെടുക്കുകയും ചെയ്തു.
താഴേക്കാട് ചക്കാലയ്ക്കല്‍ അന്തിക്കന്‍ വീട്ടില്‍ ലിജോയുടെ ഭാര്യ ജിസ അപകടത്തില്‍പ്പെട്ട് മരണപ്പെട്ട കേസിലാണ് അറസ്റ്റ്.
ജിസ ഓടിച്ചിരുന്ന സ്‌കൂട്ടറിനെ ബിവിന്‍ ഓടിച്ച ബൈക്ക് ഇടിക്കുകയായിരുന്നു. തുടര്‍ന്ന് ഇയാള്‍ ബൈക്ക് നിര്‍ത്താതെ പോവുകയായിരുന്നു.
പരിസരത്തെ സി.സി.ടി.വി കാമറാ ദൃശ്യങ്ങള്‍ പരിശോധിച്ചും ശാസ്ത്രീയ പരിശോധനകളിലൂടെയുമാണ് പ്രതിയെ കണ്ടെത്തി പിടികൂടാനായത്.