കുട്ടനാട്:  കൊയ്ത്തുകഴിഞ്ഞ പാടശേഖരത്തിലെ കച്ചി കത്തിക്കുന്നതിനിടെ തീപടര്‍ന്ന് സംഭരണത്തിനായി സൂക്ഷിച്ചിരുന്ന നെല്ല് കത്തിനശിച്ചു. നെടുമുടി കൃഷിഭവന്‍ പരിധിയില്‍ വരുന്ന മാത്തൂര്‍ പാടശേഖരത്തില്‍ ഇന്നലെ ഉച്ചകഴിഞ്ഞ് രണ്ടോടെയാണ് സംഭവം. കൊയ്ത്തുകഴിഞ്ഞ പാടശേഖരത്തില്‍ അടുത്ത കൃഷിക്കുള്ള നിലമൊരുക്കലിന്റെ ഭാഗമായിട്ടാണ് കര്‍ഷകര്‍ കച്ചിക്കു തീയിട്ടത്. ഇതേസമയം തന്നെ പാടശേഖരത്തില്‍ വിളവെടുത്ത് നെല്ലിന്റെ സംഭരണവും നടന്നുവരികയായിരുന്നു. ശക്തമായ കാറ്റിനെത്തുടര്‍ന്ന് കച്ചിയില്‍ നിന്നും സംഭരണത്തിനായി നെല്ലു നിറച്ചുവച്ചിരുന്ന ചാക്കുകളിലേക്ക് തീ പടരുകയായിരുന്നു. സംഭവസമയം ജോലിയില്‍ ഏര്‍പ്പെട്ടിരുന്ന തൊഴിലാളികളും കര്‍ഷകരും ഊണുകഴിക്കാന്‍ പോയിരിക്കുകയായിരുന്നു.