മൂവാറ്റുപുഴ: കുടുംബശ്രീ കൂട്ടായ്മയില്‍ നിര്‍ദ്ധന കുടുംബത്തിന് സ്വപ്ന കൂട് ഒരുങ്ങുന്നു. പോത്താനിക്കാട് ഗ്രാമപഞ്ചായത്ത് കുടുംബശ്രീയുടെ നേതൃത്വത്തിലാണ് നിര്‍ദ്ധന കുടുംബത്തിന് വീടൊരുക്കുന്നത്.
പഞ്ചായത്തിലെ മൂന്നാം വാര്‍ഡിലെ മാവുടിയില്‍ താമസിക്കുന്ന തങ്ങളുടെ സഹപ്രവര്‍ത്തകയായ സില്‍വി രാജനാണ് കുടുംബശ്രീ കൂട്ടായ്മയില്‍ വീടൊരുങ്ങുന്നത്. ഇവര്‍ക്ക് സ്വന്തമായിട്ടുള്ള നാല് സെന്റ് സ്ഥലത്ത് ആറ് ലക്ഷത്തോളം രൂപ ചിലവഴിച്ചാണ് വീടൊരുക്കുന്നത്. പഞ്ചായത്തിലെ മുഴുവന്‍ കുടുംബശ്രീ അംഗങ്ങളില്‍ നിന്നും സ്വരൂപിച്ച പണവും പഞ്ചായത്ത് ഭരണ സമിതിയുടെ സഹായവും ഇവര്‍ക്ക് ലഭ്യമായി കഴിഞ്ഞു. ബാക്കിവരുന്ന പണത്തിന് ഉദാരമതികളുടെ സഹായം തേടാനൊരുങ്ങുകയാണ് കുടുംബശ്രീ പ്രവര്‍ത്തകര്‍. വീടിന്റെ തറക്കല്ലിടല്‍ കര്‍മ്മം എല്‍ദോ എബ്രഹാം എംഎല്‍എ നിര്‍വ്വഹിച്ചു. പഞ്ചായത്ത് പ്രസിഡന്റ് അലക്‌സി സ്‌കറിയ അധ്യക്ഷത വഹിച്ചു.
ബ്ലോക്ക് പഞ്ചായത്ത് വൈസ് പ്രസിഡന്റ് വില്‍സണ്‍ ഇല്ലിക്കല്‍, പഞ്ചായത്ത് വൈസ് പ്രസിഡന്റ് സജി.കെ.വര്‍ഗീസ്, മെമ്പര്‍മാരായ ജിമ്മി.കെ.തോമസ്, ജെറീഷ് തോമസ്, ജേക്കബ് മണിത്തോട്ടം, ആന്‍സി ഇമ്മാനുവല്‍, സി.ഡി.എസ്.ചെയര്‍പേഴ്‌സണ്‍ മല്ലിക ഹരിദാസ്, വൈസ് ചെയര്‍പേഴ്‌സണ്‍ മജ്ഞു സാബു എന്നിവര്‍ സംമ്പന്ധിച്ചു.