ന്യൂഡല്‍ഹി: കൊവിഡ് രോഗികള്‍ക്ക് ഹോം ക്വാറന്റൈന് മുന്‍പ് അഞ്ചുദിവസത്തെ ഇന്‍സ്റ്റിറ്റ്യൂഷണല്‍ ക്വാറന്റൈന്‍ നിര്‍ബന്ധമാക്കിയ ഉത്തരവ് ഡല്‍ഹി ലെഫ്റ്റനന്റ് ഗവര്‍ണര്‍ അനില്‍ ബൈജാല്‍ പിന്‍വലിച്ചു. ഡല്‍ഹി സര്‍ക്കാരിന്റെ പ്രതിഷേധത്തെ തുടര്‍ന്നാണ് ഉത്തരവ് പിന്‍വലിച്ചത്.

ലക്ഷണങ്ങളില്ലാത്ത, ആശുപത്രി ചികിത്സ ആവശ്യമില്ലാത്ത രോഗികള്‍ക്ക് അഞ്ചുദിവസത്തെ ഇന്‍സ്റ്റിറ്റിയൂഷണല്‍ ക്വാറന്റൈന്‍ നിര്‍ബന്ധമാക്കി വെള്ളിയാഴ്ചയാണ് ലഫ്റ്റനന്റ് ഗവര്‍ണര്‍ ഉത്തരവിട്ടത്. എന്നാല്‍, ഡല്‍ഹിക്ക് മാത്രമായി ഇത്തരത്തിലൊരു നിബന്ധന എങ്ങനെ കൊണ്ടുവരാന്‍ കഴിയുമെന്നായിരുന്നു മുഖ്യമന്ത്രി അരവിന്ദ് കെജ്‌രിവാളിന്റെ നിലപാട്.

രാജ്യമെങ്ങുമുള്ള രോഗലക്ഷണങ്ങള്‍ പ്രകടിപ്പിക്കാത്ത രോഗികള്‍ക്ക് ഹോം ക്വാറന്റൈനില്‍ പോകാന്‍ ഐ.സി.എം.ആര്‍ അനുമതി നല്‍കിയിട്ടുള്ളപ്പോള്‍ എന്തുകൊണ്ടാണ് ഡല്‍ഹിക്ക് മാത്രം വ്യത്യസ്ത മാര്‍ഗനിര്‍ദേശങ്ങളെന്നും കെജ്‌രിവാള്‍ ചോദിച്ചു. ഡല്‍ഹിയിലെ ഭൂരിഭാഗം കൊവിഡ് രോഗികളും രോഗലക്ഷണം പ്രകടിപ്പിക്കാത്തവരാണെന്നും കെജ്‌രിവാള്‍ പറഞ്ഞു. തുടര്‍ന്നാണ് ഉത്തരവ് പിന്‍വലിച്ചത്.