ഈരാറ്റുപേട്ട: പത്തനംതിട്ട മണ്ഡലത്തില്‍ ബി.ജെ.പി.യെ പിന്തുണയ്ക്കുമെന്ന വാര്‍ത്തയ്ക്ക് പിന്നാലെ ജോര്‍ജിന്റെ പാര്‍ട്ടിയില്‍ നീരസം ഉരുണ്ടുകൂടുന്നു. പി.സി ജോര്‍ജ് എം.എല്‍.എയുടെ എന്‍.ഡി.എ.യെ പിന്തുണക്കുവാനുള്ള തീരുമാനം ഞങ്ങള്‍ അംഗീകരിക്കുകയില്ലെന്ന് ഈരാറ്റുപേട്ട നഗരസഭ വൈസ് ചെയര്‍പേഴ്‌സന്‍ ബള്‍ക്കീസ് നവാസ്, സ്റ്റാന്‍ഡിങ് കമ്മിറ്റി ചെയര്‍മാന്‍ പി.എച്ച് ഹസീബ്, കൗണ്‍സിലര്‍ ജോസ് മാത്യു അറിയിച്ചു. തങ്ങള്‍ യു.ഡി.എഫിനോടൊപ്പമാണെന്നും അവര്‍ പറഞ്ഞു.
കഴിഞ്ഞ നഗരസഭാ തെരഞ്ഞെടുപ്പില്‍ കേരളകോണ്‍ഗ്രസ് സെകുലര്‍ പാര്‍ട്ടിയിലാണ് മൂന്ന് അംഗങ്ങള്‍ നഗരസഭയിലേക്ക് വിജയിച്ചുവന്നത്. കഴിഞ്ഞ വര്‍ഷം അവിശ്വാസത്തിലൂടെ യു.ഡി.എഫും ഈ അംഗങ്ങളും ചേര്‍ന്ന് എല്‍.ഡി.എഫ് ഭരണം അട്ടിമറിച്ച് ഈരാറ്റുപേട്ട നഗരസഭാ ഭരണം പിടിച്ചിരുന്നു. അന്നത്തെ എഗ്രിമെന്റ് പ്രകാരം യു.ഡി.എഫില്‍ തന്നെ തുടരുമെന്ന് പാര്‍ലമെന്ററി പാര്‍ട്ടി ലീഡര്‍ കൂടിയായ പി.എച്ച് ഹസീബ് പറഞ്ഞു. ജനവഞ്ചന കാണിച്ച പി.സി ജോര്‍ജ് എം.എല്‍.എ സ്ഥാനം രാജിവയ്ക്കണമെന്നാവശ്യപ്പെട്ട് ഈരാറ്റുപേട്ട നഗരത്തില്‍ യു.ഡി.എഫ് പ്രവര്‍ത്തകര്‍ പ്രകടനം നടത്തി. അഡ്വ. ജോമോന്‍ ഐക്കര, വി.എം ഇല്ല്യാസ്, അഡ്വ. വി.പി നാസര്‍, വി.എച്ച് നാസര്‍ , വി.പി അബ്ദുല്‍ ലത്തീഫ് പ്രകടനത്തിന് നേതൃത്വം നല്‍കി. നിരവധി ജനപക്ഷം പ്രവര്‍ത്തകരും പ്രകടത്തില്‍ അണിചേര്‍ന്നു.