കൊച്ചി: വിഷരഹിത മത്സ്യം കുറഞ്ഞ നിരക്കില്‍ ജനങ്ങളിലെത്തിക്കാന്‍ ധര്‍മൂസ് ഫിഷ് ഹബ്ബ്് ആരംഭിച്ചതായി നടന്‍ ധര്‍മജന്‍. ഒരു വര്‍ഷത്തോളം വിശദമായ പഠനം നടത്തിയതിനുശേഷമാണ് പുതിയ സംരംഭം ആരംഭിക്കുന്നതെന്നും ധര്‍മജന്‍ വാര്‍ത്താസമ്മേളനത്തില്‍ പറഞ്ഞു. മത്സ്യഫാമുകളില്‍ നിന്നും സ്വന്തമായി മത്സ്യകൃഷി നടത്തിയുമാണ് മത്സ്യം വില്‍പനയ്‌ക്കെത്തിക്കുന്നത്. നിലവിലെ മാര്‍ക്കറ്റ് വിലയില്‍ നിന്നും കുറഞ്ഞ നിരക്കിലായിരിക്കും മത്സ്യം വില്‍ക്കുക. ജീവനുള്ള മീനുകളെ ലഭ്യമാക്കുന്നതിന് ഫിഷ് ഹബ്ബില്‍ തന്നെ ടാങ്കുകളും സ്ഥാപിച്ചിട്ടുണ്ട്. പുതിയ സംരംഭത്തില്‍ ധര്‍മജന്റെ പത്ത് സുഹൃത്തുക്കളും പങ്കാളികളായിട്ടുണ്ട്.
ആദ്യ ഔട്ട്‌ലെറ്റ് കൊച്ചി അയ്യപ്പന്‍കാവില്‍ നടന്‍ കുഞ്ചാക്കോ ബോബന്‍ ഉദ്ഘാടനം ചെയ്തു. ഈ മാസം തന്നെ 16 ഔട്ട്‌ലെറ്റുകള്‍കൂടി ആരംഭിക്കുമെന്നും ഉടന്‍തന്നെ സംസ്ഥാനത്തിന്റെ എല്ലാഭാഗങ്ങളിലേക്കും പ്രവര്‍ത്തനം വ്യാപിപ്പിക്കുമെന്നും ധര്‍മജന്‍ പറഞ്ഞു.