ആലപ്പുഴ ബൈപ്പാസ് സമയബന്ധിതമായി പൂര്‍ത്തിയാക്കാന്‍ ബന്ധപ്പെട്ട ഉദ്യോഗസ്ഥര്‍ക്കും കരാറുകാര്‍ക്കും മന്ത്രി നിര്‍ദേശം നല്‍കി
ആലപ്പുഴ: ബൈപ്പാസ് നിര്‍മാണത്തിന്റെ ഭാഗമായി വരുന്ന രണ്ടു റെയില്‍വേ മേല്‍പ്പാലങ്ങളുടെ പ്രവൃത്തികളില്‍ ഡി.പി.ആര്‍ പ്രകാരം ഉപയോഗിക്കേണ്ട സ്റ്റീല്‍ ഗര്‍ഡറുകള്‍ ലഭിക്കുന്നതിന് വളരെയധികം കാലതാമസമുണ്ടാകുമെന്നതിനാല്‍ ഗ്രേഡ് മാറ്റി ഉപയോഗിക്കാന്‍ ഉള്ള അനുമതി പൊതുമരാമത്ത് വകുപ്പിന് റെയില്‍വേയില്‍ നിന്നു ലഭിച്ചതായി മന്ത്രി ജി.സുധാകരന്‍ അറിയിച്ചു.
ആലപ്പുഴ ബൈപ്പാസ് സംബന്ധിച്ചു പൊതുമരാമത്ത് വകുപ്പു മന്ത്രി നടത്തിയ അവലോകന യോഗത്തില്‍ ഇക്കാര്യം സംബന്ധിച്ച വിഷയങ്ങള്‍ ചര്‍ച്ച ചെയ്തിരുന്നു. ഇ-350 ബി.ഒക്കു പകരം ഇ-350 ബി.ആര്‍ ഉപയോഗിക്കാനുള്ള അനുമതിയാണ് ലഭിച്ചത്. ആദ്യം ഡിസൈനില്‍ ഉള്‍പ്പെടുത്തിയ ഗ്രേഡിലുള്ള ഗര്‍ഡറുകള്‍ ലഭിക്കാന്‍ അസാധാരണ കാലതാമസം ഉണ്ടാകുമെന്നതിനാലാണ് ഈ മാറ്റം.
ദേശീയപാത ചീഫ് എന്‍ജിനീയര്‍ നല്‍കിയ കത്തിന്റെയും, കഴിഞ്ഞ ദിവസം മന്ത്രിയുടെ നിര്‍ദ്ദേശാനുസരണം പൊതുമരാമത്ത് വകുപ്പു സെക്രട്ടറി കമലവര്‍ദ്ധന റാവു ഡല്‍ഹിയില്‍ റെയില്‍വേ അധികാരികളുമായി ചര്‍ച്ച ചെയ്തിന്റേയും അടിസ്ഥാനത്തില്‍ സതേണ്‍ റെയില്‍വേയുടെ ചീഫ് ബ്രിഡ്ജ് എന്‍ജിനീയര്‍ ഇന്നലെ അനുമതി നല്‍കുകയായിരുന്നു. ആലപ്പുഴ ബൈപ്പാസ് സമയബന്ധിതമായി പൂര്‍ത്തിയാക്കാന്‍ ബന്ധപ്പെട്ട ഉദ്യോഗസ്ഥര്‍ക്കും കരാറുകാര്‍ക്കും മന്ത്രി നിര്‍ദ്ദേശം നല്‍കുകയും ചെയ്തു.