പെരിന്തല്‍മണ്ണ: 16 വയസിന് താഴെയുള്ളവരുടെ ഉത്തര മേഖലാ അന്തര്‍ ജില്ലാ ദ്വിദിന ക്രിക്കറ്റ് മത്സരത്തില്‍ വയനാടിനെതിരേ കണ്ണൂരിന് 10 വിക്കറ്റിന്റെ വിജയം. പെരിന്തല്‍മണ്ണ ക്രിക്കറ്റ് സ്റ്റേഡിയത്തില്‍ വച്ച് നടക്കുന്ന പോരാട്ടത്തില്‍ 51 ഓവറില്‍ നാല് വിക്കറ്റ് നഷ്ടത്തില്‍ 158 റണ്‍സില്‍ നിന്നു ഇന്നിങ്‌സ് പുനരാരംഭിച്ച കണ്ണൂര്‍ 70 ഓവറില്‍ ഒന്‍പത് വിക്കറ്റ് നഷ്ടത്തില്‍ 219 റണ്‍സെടുത്തു. കണ്ണൂരിനായി വരുണ്‍ നായനാര്‍ (84), മുഹമ്മദ് ഹാനി പാറക്കോടന്‍ (31), ചിന്മയ് എം.സി (28) എന്നിവര്‍ മികച്ച പ്രകടനം നടത്തി. രണ്ടാം ഇന്നിങ്‌സ് ആരംഭിച്ച വയനാട് 55.2 ഓവറില്‍ 114 റണ്‍സിന് എല്ലാവരും പുറത്ത്. വയനാടിന്റെ അങ്കിത്ത് എസ് രവി 44 റണ്‍സ് നേടി. കണ്ണൂരിന് വേണ്ടി വിഷ്ണു എം.പി 13 ഓവറില്‍ 24 റണ്‍സ് വിട്ടുകൊടുത്തും മുഹമ്മദ് ഹാനി പാറക്കോടന്‍ 14 ഓവറില്‍ 42 റണ്‍സ് വഴങ്ങിയും മൂന്ന് വീതം വിക്കറ്റുകള്‍ നേടി. എട്ട് റണ്‍സ് വിജയ ലക്ഷ്യവുമായി രണ്ടാം ഇന്നിങ്‌സിനിറങ്ങിയ കണ്ണൂര്‍ രണ്ട് പന്തില്‍ 10 റണ്‍സെടുത്ത് വിജയം കണ്ടു.