കോഴിക്കോട്: സി.പി.എമ്മിന്റെ സ്ത്രീ നവോത്ഥാനം കാപട്യമാണെന്ന് എല്‍.ഡി.എഫ് കണ്‍വീനര്‍ എ. വിജയരാഘവന്റെ പ്രസ്താവനയിലൂടെ വ്യക്തമായതായി വനിതാലീഗ് സംസ്ഥാന പ്രസിഡന്റ് സുഹ്‌റ മമ്പാടും ജനറല്‍ സെക്രട്ടറി അഡ്വ. പി. കുല്‍സുവും പറഞ്ഞു. അവിവാഹിതയായ യുവതിയെ ഏതെങ്കിലും പുരുഷനുമായി ചേര്‍ത്ത് അശ്ലീല പരാമര്‍ശം നടത്തുന്നത് മാപ്പര്‍ഹിക്കാത്ത തെറ്റാണ്.
പുരുഷ കേന്ദ്രീകൃത മാടമ്പിത്തരത്തില്‍ അഭിരമിക്കുന്ന കമ്മ്യൂണിസ്റ്റുകളുടെ തനി സ്വരൂപമാണ് വിജയരാഘവന്റെ വായിലൂടെ പുറത്തുചാടിയത്. സ്ത്രീ സംരക്ഷകരെന്ന് മേനി നടിക്കുന്നവര്‍ വനിതാ സ്ഥാനാര്‍ഥിയെപ്പോലും വെറുതേവിടുന്നില്ല.
രമ്യക്കെതിരായ ആക്ഷേപം സി.പി.എമ്മിന്റെ ചരിത്രത്തിലെ ആദ്യത്തെയോ അവസാനത്തെയോ ആകാന്‍ സാധ്യതയില്ല.
മുതിര്‍ന്ന നേതാവ് വി.എസ് അച്യുതാന്ദന്‍ മലമ്പുഴയില്‍ മുന്‍പ് നടത്തിയതും ഇതിന് സമാനമായ പ്രസ്താവനയാണ്. എല്ലാ പാര്‍ട്ടി ഓഫിസുകളും ചേര്‍പ്പുളശ്ശേരിയിലെ സി.പി.എം ഓഫിസ് പോലെ അല്ല. വിജയരാഘവനെതിരേ കേസെടുക്കണമെന്നും അവര്‍ ആവശ്യപ്പെട്ടു.