വടകര: ബാഡ്മിന്റണ്‍ അമ്പയറിങ് രംഗത്ത് 25 വര്‍ഷം പൂര്‍ത്തിയാക്കിയ എ.എം.രമേശിനു വടകര പൗരാവലി സ്വീകരണം നല്‍കി. ടൗണ്‍ഹാളില്‍ നടന്ന ചടങ്ങ് പാറക്കല്‍ അബ്ദുള്ള എം.എല്‍.എ ഉദ്ഘാടനം ചെയ്തു.
വടകരയിലെ കലാ-കായിക-സാമൂഹിക പ്രവര്‍ത്തകര്‍ മിഡ്ടൗണ്‍ ലയണ്‍സ് ക്ലബിന്റെ സഹകരണത്തോടെ സംഘടിപ്പിച്ച ചടങ്ങില്‍ മുനിസിപ്പല്‍ ചെയര്‍മാന്‍ കെ.ശ്രീധരന്‍ അധ്യക്ഷനായി. വിവിധ സംഘടനകള്‍ ഹാരാര്‍പണം നടത്തി.
ദേശീയ ബാഡ്മിന്റണ്‍ വനിതാ ചാമ്പ്യന്‍ പി.സി തുളസി, ഡോ. ശിവരാജ് (സ്‌പോര്‍ട്‌സ് അതോറിറ്റി ഓഫ് ഇന്ത്യ), ലയണ്‍സ് ക്ലബ് മുന്‍ ഡിസ്ട്രിക്ട് ഗവര്‍ണര്‍ ടി.ബാലക്കുറുപ്പ്, ഗീത രമേശ്, നിഷ സുരേന്ദ്രന്‍ സംസാരിച്ചു. സ്വാഗതസംഘം ചെയര്‍മാന്‍ പുറന്തോടത്ത് സുകുമാരന്‍ സ്വാഗതവും ജനറല്‍ കണ്‍വീനര്‍ എ.പി.മോഹന്‍രാജ് നന്ദിയും പറഞ്ഞു.