കട്ടാങ്ങല്‍: മൊബൈല്‍ ഷോപ്പില്‍ മോഷണം നടത്തിയ പ്രതിയെ കുന്ദമംഗലം പൊലിസ് സബ് ഇന്‍സ്‌പെക്ടര്‍ എസ്.ബി കൈലാസ്‌നാഥും സംഘവും അറസ്റ്റ് ചെയ്തു. പിലാശ്ശേരി മേലെ മരത്തൂര്‍ ജസീല്‍ (20) ആണ് അറസ്റ്റിലായത്.
ഇന്നലെ രാവിലെ കുന്ദമംഗലം ബസ് സ്റ്റാന്‍ഡില്‍ വച്ചാണ് പ്രതിയെ പിടികൂടിയത്. കഴിഞ്ഞ മാസം ഇരുപതിന് പുലര്‍ച്ചെയാണ് പുള്ളാവൂര്‍ സ്വദേശി നൗഷാദിന്റെ കെട്ടാങ്ങല്‍ മലയമ്മ റോഡിലുള്ള മൊബൈല്‍ ഷോപ്പില്‍ മോഷണം നടന്നത്. മൊബൈല്‍ ഫോണുകള്‍, മെമ്മറി കാര്‍ഡുകള്‍ തുടങ്ങിയ സാധനങ്ങളാണ് മോഷ്ടിക്കപ്പെട്ടത്.
ആകെ ഒരു ലക്ഷത്തി ഒന്‍പതിനായിരം രൂപയുടെ സാധനങ്ങളായിരുന്നു നഷ്ടപ്പെട്ടിരുന്നത്. മോഷണ വസ്തുക്കള്‍ പ്രതിയില്‍ നിന്ന് കണ്ടെത്തി. സമീപത്തെ കടയിലെ സി.സി.ടി.വി ദൃശ്യങ്ങളില്‍ നിന്നാണ് പൊലിസ് പ്രതിയെ കണ്ടെത്തിയത്.
മോഷ്ടാവിനെ തിരിച്ചറിഞ്ഞ പൊലിസ് കഴിഞ്ഞ കുറച്ച് ദിവസമായി ഇയാളെ നിരീക്ഷിച്ച് വരികയായിരുന്നു. ഇന്നലെ രാവിലെ കുന്ദമംഗലത്തെത്തിയ പ്രതിയെ പൊലിസ് അറസ്റ്റ് ചെയ്യുകയായിരുന്നു. എ.എസ്.ഐ ബാബു പുതുശ്ശേരി, സി.പി.ഒമാരായ ഇ. രജീഷ്, ഷാഫി, സജി, അഖിലേഷ്, പ്രബിന്‍, ജിനേഷ് എന്നിവരടങ്ങിയ സംഘമാണ് പ്രതിയെ പിടികൂടിയത്.
ഇയാളെ ചോദ്യം ചെയ്തപ്പോള്‍ സ്‌കൂട്ടര്‍ മോഷണ കേസിനും തുമ്പായി. സ്‌കൂട്ടര്‍ അടക്കമാണ് ഇയാളെ പിടികൂടിയിരുന്നത്. ഇയാള്‍ ഓടിച്ച ആക്‌സസ് സ്‌കൂട്ടറിന്റെ രേഖകള്‍ പരിശോധിച്ചപ്പോള്‍ മാഹിയിലെ ലെജന്റ് ഹോട്ടല്‍ ഉടമയുടെ പേരിലാണ് വാഹനം രജിസ്റ്റര്‍ ചെയ്തതെന്ന് കണ്ടെത്തി. ഇതേ തുടര്‍ന്ന് പ്രതിയെ കൂടുതല്‍ ചോദ്യം ചെയ്തപ്പോള്‍ സ്‌കൂട്ടര്‍ മാഹിയിലെ ഹോട്ടലില്‍ നിന്ന് മോഷ്ടിച്ചതാണെന്ന് പ്രതി സമ്മതിക്കുകയായിരുന്നു. ഇതേ തുടര്‍ന്ന് മാഹി പൊലിസ് സ്‌കൂട്ടര്‍ മോഷണ കേസില്‍ കൂടി കേസെടുത്ത് അറസ്റ്റ് രേഖപ്പെടുത്തി. കോടതിയില്‍ ഹാജരാക്കിയ പ്രതിയെ 14 ദിവസത്തേക്ക് റിമാന്‍ഡ് ചെയ്തു.