ഇസ്‌ലാമാബാദ്: പാകിസ്താനിലെ പെഷാവറില്‍ സ്‌കൂള്‍ ആക്രമിച്ച് 130 വിദ്യാര്‍ഥികളെ കൊലപ്പെടുത്തിയ സംഭവത്തിലെ പ്രധാനപ്രതി യു.എസ് വ്യോമാക്രമണത്തില്‍ കൊല്ലപ്പെട്ടു. പെഷാവറിലെ സൈനിക സ്‌കൂളില്‍ ക്ലാസ് മുറികളില്‍ കയറി വിദ്യാര്‍ഥികളെയും അധ്യാപകരെയും കൂട്ടക്കുരുതി നടത്തിയ സംഭവത്തിലെ മുഖ്യ സൂത്രധാരനും കൊടുംഭീകരനുമായ ഉമര്‍ നരായിയാണ് കൊല്ലപ്പെട്ടത്.
വിദ്യാര്‍ഥികള്‍ ഉള്‍പ്പെടെ 150 പേരാണ് 2014 ഡിസംബറില്‍ നടന്ന ആക്രമണത്തില്‍ കൊല്ലപ്പെട്ടത്. പാക് അഫ്ഗാന്‍ അതിര്‍ത്തിയിലെ നാഗര്‍ഹറിലാണ് ഇയാള്‍ കൊല്ലപ്പെട്ടതെന്ന് യു.എസ് -പാക് അധികൃതര്‍ പറഞ്ഞു. സ്‌കൂള്‍ ആക്രമണത്തിന് പുറമെ മറ്റ് അനവധി ആക്രമണങ്ങളിലും പ്രതിയാണ് കൊല്ലപ്പെട്ട ഉമര്‍ നരായി. പാക് താലിബാനുമായി ബന്ധപ്പെട്ട് പ്രവൃത്തിക്കുന്ന തീവ്രവാദ സംഘടനയായ താരിഖ് ജിദാര്‍ ഗ്രൂപ്പില്‍ പെട്ടയാളാണ് ഇയാള്‍.