കേളകം: നന്മ പദ്ധതിക്ക് കേളകം സെന്റ് തോമസ് ഹയര്‍ സെക്കന്‍ഡറിയില്‍ തുടക്കമായി. ഹയര്‍ സെക്കന്ററി വിഭാഗത്തിലെ സ്‌കൗട്ട് ഗൈഡ് കുട്ടികളാണ് ആദിവാസി വിദ്യാര്‍ഥികളെ സഹായിക്കുന്നതിനായി പദ്ധതിയാരംഭിച്ചത്.
ഈ അധ്യയന വര്‍ഷത്തെ പദ്ധതിയില്‍ ഉടുക്കാന്‍ വസ്ത്രം എന്ന പ്രോജക്ടാണ് നടപ്പിലാക്കിയത്. ഇതിന്റെ ഭാഗമായി വയനാട് മേഖലയിലെ ആദിവാസി കുട്ടികള്‍ക്ക് ആവശ്യമായ വസ്ത്രങ്ങള്‍ എത്തിച്ചു നല്‍കി. സെന്റ് തോമസിലെ ഹൈസ്‌കൂള്‍, ഹയര്‍ സെക്കന്ററി വിഭാഗത്തില്‍ നിന്നായാണ് വസ്ത്ര ശേഖരണം നടത്തിയത്. ആയിരത്തോളം പുതുവസ്ത്രങ്ങള്‍ കുട്ടികള്‍ ശേഖരിച്ചു.
കേളകം സെന്റ് തോമസ് ഹയര്‍ സെക്കന്‍ഡറി വിഭാഗത്തിലെ സ്‌കൗട്ട് ട്രൂപ്പ് ലീഡര്‍ അശ്വിന്‍, കമ്പനി ലീഡര്‍ എലിസബത്ത്, ഗൈഡ് ക്യാപ്റ്റന്‍ സ്മിതാ കേളോത്ത് എന്നിവര്‍ പ്രവര്‍ത്തനങ്ങള്‍ക്ക് നേതൃത്വം നല്‍കി. ശേഖരിച്ച വസ്ത്രങ്ങള്‍ വയനാട് മേഖലയിലെ അധികൃതര്‍ക്ക് കൈമാറി.