അതിരമ്പുഴ: കളഞ്ഞുകിട്ടിയ സ്വര്‍ണാഭരണം ഉടമയ്ക്കു നല്‍കി വീട്ടമ്മ മാതൃകയായി. അതിരമ്പുഴ മുകളേല്‍ ഓമന ജോയിയാണ് വഴിവക്കില്‍ കിടന്നുകിട്ടിയ സ്വര്‍ണമാല ഉടമയ്ക്കു നല്‍കിയത്.
അതിരമ്പുഴയിലെ പെട്രോള്‍ പമ്പിനുസമീപം വച്ചാണു കഴിഞ്ഞദിവസം ഓമനയ്ക്കു മാല കിട്ടിയത്. മാല കിട്ടിയ വിവരം ഓമന പെട്രോള്‍ പമ്പ് അധികൃതരെ അറിയിച്ചിരുന്നു. അതിരമ്പുഴ പുതുശേരില്‍ ജിജോ ജോസഫിന്റെ ഒന്നര വയസുള്ള കുട്ടിയുടെ കഴുത്തില്‍ അണിഞ്ഞിരുന്ന മാലയാണ് നഷ്ടപ്പെട്ടത്.
ഭാര്യയ്ക്കും കുട്ടികള്‍ക്കുമൊപ്പം ബൈക്കില്‍ സഞ്ചരിക്കുന്നതിനിടെയാണ് മാല നഷ്ടപ്പെട്ടത്. അതിരമ്പുഴ മര്‍ച്ചന്റ്‌സ് അസോസിയേഷന്‍ പ്രസിഡന്റ് ജോയ്‌സ് ആന്‍ഡ്രൂസ് മൂലേക്കരിയുടെ സാന്നിധ്യത്തില്‍ സ്വര്‍ണമാല ഓമന ജിജോയ്ക്കു കൈമാറി.