തിരുവനന്തപുരം: കൈയേറ്റമൊഴിപ്പിക്കാന്‍ ജെ.സി.ബി വേണ്ടെന്നും നിശ്ചയദാര്‍ഢ്യം മതിയെന്നും സി.പി.ഐ സംസ്ഥാന സെക്രട്ടറി കാനം രാജേന്ദ്രന്‍. ഒഴിപ്പിക്കല്‍ നടപടികള്‍ നിറുത്തിവച്ചിട്ടില്ല. അനധികൃത കൈയേറ്റങ്ങള്‍ നിയമപരമായി ഒഴിപ്പിക്കാനുള്ള എല്ലാ നടപടികളും തുടരും. 

മൂന്നാറില്‍ സ്ഥാപിച്ചത് ത്യാഗത്തിന്റെ കുരിശല്ല, കൈയേറ്റത്തിന്റെ കുരിശാണ്. വീണ്ടും കുരിശ് സ്ഥാപിച്ചത് സര്‍ക്കാരിന്റെ നടപടികളോടുള്ള വെല്ലുവിളിയാണ്. ഇതിനെ നിയമപരമായി നേരിടും.നിയമപരമായി തന്നെയാണ് റവന്യൂ വകുപ്പ് ഒഴിപ്പിക്കല്‍ നടപടികള്‍ സ്വീകരിക്കുന്നത്. പൂമെത്തയിലൂടെയുള്ള നടത്തമല്ല കൈയേറ്റം ഒഴിപ്പിക്കലെന്നത്. പ്രതിബന്ധങ്ങളെ ഇല്ലാതാക്കി മുന്നോട്ടുപോവുകയാണ് വേണ്ടത്. ഇതിന് സര്‍ക്കാര്‍ വഴിയൊരുക്കുകയാണ് വേണ്ടത്. കഴിഞ്ഞ ദിവസം ചേര്‍ന്ന ഉന്നതതല യോഗത്തില്‍ മുഖ്യമന്ത്രി റവന്യൂ ഉദ്യോഗസ്ഥരെ ശാസിച്ചെന്ന വാര്‍ത്തകള്‍ അടിസ്ഥാനരഹിതമാണ്. മാധ്യമങ്ങള്‍ക്ക് ലഭിക്കുന്ന എല്ലാ വിവരങ്ങളും ശരിയാണെന്ന് ധരിക്കരുതെന്നും അദ്ദേഹം പറഞ്ഞു.