തിരുവനന്തപുരം: സംസ്ഥാന പൊലിസ് സേനയില്‍ സാങ്കേതിക യോഗ്യതകള്‍ നേടിയവരുടെ വൈദഗ്ധ്യവും അനുഭവ പരിചയവും കൂടുതല്‍ ഫലപ്രദമായി ഉപയോഗപ്പെടുത്തുന്നതിന് സംവിധാനം ഒരുങ്ങുന്നു.
ഇതിനായി വിവിധ ബറ്റാലിയനുകളിലെ സാങ്കേതിക യോഗ്യതകളുള്ള 152 സേനാംഗങ്ങളുമായി സംസ്ഥാന പൊലിസ് മേധാവി ലോക്‌നാഥ് ബെഹ്‌റയും മറ്റ് ഉന്നത പൊലിസ് ഉദ്യോഗസ്ഥരും ആശയവിനിമയം നടത്തി. സാധാരണ പൊലിസ് ചുമതലകള്‍ക്കപ്പുറം യോഗ്യതക്ക് അനുസരിച്ച് സാങ്കേതിക കഴിവുകള്‍ ആവശ്യമായ ചുമതലകള്‍ ഇവര്‍ക്ക് നല്‍കാനാണ് ഉദ്ദേശിക്കുന്നത്. ഇതിനായുള്ള പ്രവര്‍ത്തനപരിപാടിക്ക് രൂപം നല്‍കി വരികയാണെന്ന് ഡി.ജി.പി പറഞ്ഞു.
സംസ്ഥാന പൊലിസ് സേനയില്‍ വിവിധ ബറ്റാലിയനുകളില്‍ മാത്രമായി കോണ്‍സ്റ്റബിള്‍-സിവില്‍ പൊലിസ് ഓഫിസര്‍മാരുമായി 160 ഓളം പേരുണ്ട്. ഇവരില്‍ 68 ബിടെക്കുകാരും, 22 എം.ബി.എ-ബി.ബി.എ ക്കാരും, 15 എം.സി.എ- എം.എസ്.സി കമ്പ്യൂട്ടര്‍ സയന്‍സുകാരും ഒരു എം. ടെക് ബിരുദധാരിയും എട്ട് എല്‍.എല്‍.ബി-എല്‍.എല്‍.എം ബിരുദധാരികളും, ഒമ്പത് എം.ഫില്‍ ബിരുദ ധാരികളും 13 പി.ജി.ഡി.സി.എ ക്കാരും ഉള്‍പ്പെടുന്നു. ഇവരുടെ സാങ്കേതിക യോഗ്യതകളും അനുഭവപരിചയവുമാണ് സംസ്ഥാന പൊലിസ് സേനയ്ക്കായി പ്രയോജനപ്പെടുത്തുക.
ഓരോരുത്തരുടേയും യോഗ്യതയും കഴിവും അനുസരിച്ചുള്ള പ്രവര്‍ത്തനങ്ങളില്‍ വിന്യസിക്കാന്‍ കഴിഞ്ഞാല്‍ സേനാംഗങ്ങളില്‍ നിന്ന് കൂടുതല്‍ മികച്ച പ്രകടനം പൊലിസിന് ലഭ്യമാകും. ഇത്തരത്തിലുള്ള മനുഷ്യവിഭവശേഷി വിന്യാസത്തിനാണ് ഇപ്പോള്‍ ശ്രമിക്കുന്നത്. ഈ അനുഭവം വിലയിരുത്തി കേരള പൊലിസ് ഒരു ടെക്‌നിക്കല്‍ കേഡര്‍ ഭാവിയില്‍ രൂപീകരിക്കുക എന്നതും ലക്ഷ്യമാണ.് അതിലേക്കുള്ള ആദ്യചുവടുവയ്പ്പാണിതെന്ന് ഡി.ജി.പി പറഞ്ഞു.
സൈബര്‍ ഫോറന്‍സിക്, വിവിധ ഐ.ടി അധിഷ്ഠിത പ്രവര്‍ത്തനങ്ങള്‍, സൈബര്‍ കുറ്റാന്വേഷണം, നിയമസഹായം, വിവിധ പദ്ധതികളുടെ നടത്തിപ്പ്, നവമാധ്യമപ്രവര്‍ത്തനങ്ങള്‍ തുടങ്ങിയ മേഖലകളിലാണ് സാങ്കേതിക-പ്രൊഫഷണല്‍ വൈദഗ്ധ്യമുള്ളവരെ നിയമിക്കുന്നത്.
ആംഡ് പൊലീസ് ബറ്റാലിയന്‍ ഡി.ഐ.ജി ഷെഫീന്‍ അഹമ്മദിനെ ഇതിന്റെ വിശദാംശങ്ങള്‍ തയാറാക്കുന്നതിനും ഡി.ജി.പി ചുമതലപ്പെടുത്തിയിട്ടുണ്ട്.