വിഴിഞ്ഞം: ഐ.എ.എസ് ലക്ഷ്യമിടുന്ന കുട്ടികള്‍ക്ക് പ്രചോദനവുമായി സബ് കലക്ടര്‍. പെരിങ്ങമ്മല എസ്.എന്‍.വി ഗ്രന്ഥശാലയില്‍ നടന്നുവരുന്ന സ്‌കൂള്‍ കുട്ടികള്‍ക്കായുള്ള ദീര്‍ഘകാല സിവില്‍ സര്‍വിസ് പരീക്ഷാ പരിശീലന പരിപാടിയായ 'പടവുകളില്‍'തന്റെ വിജയകഥ കുട്ടികളുമായി പങ്കിടാനെത്തിയതായിരുന്നു ശ്രീലങ്കന്‍ അഭയാര്‍ഥികള്‍ക്കിടയില്‍ നിന്നുള്ള ആദ്യ ഐ.എ.എസ് ഓഫിസറായ സബ്കലക്ടര്‍ ഇമ്പശേഖര്‍.
അഭയാര്‍ഥിയായി എത്തി ഇല്ലായ്മകളും വല്ലായ്മകളും നേരിട്ടും അതിനെതിരേ പോരാടിയുമാണ് ജീവിത വിജയം കൈവരിച്ചതെന്ന് ഇമ്പശേഖര്‍ കുട്ടികളെ ഓര്‍മിപ്പിച്ചു. ശ്രീലങ്കയിലെ ആഭ്യന്തര യുദ്ധത്തെ തുടര്‍ന്നായിരുന്നു പാലായനം. ഇവിടെ നാലഗിരിയിലെ തോട്ടം തൊഴിലാളിയായി. ജോലിയോടൊപ്പം പഠനവും തുടര്‍ന്നു. സര്‍ക്കാര്‍ സ്‌കൂളില്‍ പഠിച്ച് ഉന്നത വിജയം നേടി.
ഐ.എ.എസിലേക്ക് നാലു തവണ പരാജയപ്പെട്ടിട്ടും പിന്‍മാറാതെ ശ്രമം തുടര്‍ന്നു. ഒടുവില്‍ 2015ലാണ് ഐ.എ.എസ് നേടിയത്. ഇച്ഛാശക്തിയോടെ ആത്മവിശ്വാസം മുറുകെ പിടിച്ചാല്‍ ലക്ഷ്യത്തിലെത്താന്‍ ഒന്നും തടസമാകില്ലെന്നും തന്റെ ജീവിതം അതിന്റെ ഉദാഹരണമാണെന്നും അദ്ദേഹം പറഞ്ഞു. സജി എസ്.നായര്‍, ജി. പുഷ്പരാജന്‍ സംസാരിച്ചു.