കോഴിക്കോട്: മുസ്‌ലിം ലീഗ് വൈറസാണെന്ന യോഗി ആദിത്യനാഥിന്റെ ആരോപണം അറിവില്ലായ്മയെന്ന് പി.കെ കുഞ്ഞാലിക്കുട്ടി. യോഗിക്ക് മാത്രമാണ് പച്ചപ്പതാക കാണാന്‍ പറ്റാത്തത്. ഇന്ത്യന്‍ ജനതക്ക് അതിനോട് പ്രശ്‌നമില്ലെന്നും അദ്ദേഹം മാധ്യമപ്രവര്‍ത്തകരോട് പറഞ്ഞു.

വളരെ കാലമായി യു.ഡി.എഫ് സംവിധാനത്തില്‍ പ്രവര്‍ത്തിക്കുന്ന മതേതര പാര്‍ട്ടിയാണ് ലീഗ്. ഇത്തരം പ്രസ്താവനകള്‍ ഇടക്കിടെ നടത്തുന്ന ആളാണ് യോഗി. അത് യോഗിയെ തന്നെ തിരിഞ്ഞ് കുത്തുമെന്നും കുഞ്ഞാലിക്കുട്ടി കൂട്ടിച്ചേര്‍ത്തു.

'മുസ്‌ലിം ലീഗ് രാജ്യ വിഭജനത്തിനു വരെ ഇടയാക്കിയ വൈറസ്'- വയനാട്ടിലെ പച്ചപ്പതാകയില്‍ കലിപൂണ്ട് യോഗി

ട്വിറ്റര്‍ വഴിയായിരുന്നു യോഗി ആദിത്യനാഥിന്റെ ആക്രമണം. മുസ്‌ലിം ലീഗ് വൈറസാണെന്നും ഈ വൈറസ് ഒരിക്കല്‍ രാജ്യം വിഭജിക്കാന്‍ ഇടയാക്കിയെന്നും യോഗി ട്വിറ്ററില്‍ കുറിച്ചു. കോണ്‍ഗ്രസിന് ഈ വൈറസ് ബാധിച്ചിട്ടുണ്ട്. കോണ്‍ഗ്രസ് ജയിച്ചാല്‍ ഈവൈറസ് രാജ്യം മുഴുവന്‍ പടരുമെന്നും അദ്ദേഹം പറഞ്ഞു.