കാഞ്ഞങ്ങാട്:  കാഞ്ഞങ്ങാടിനടുത്ത പടന്നക്കാട്ട്  മൂന്നു വീടുകളില്‍ കവര്‍ച്ച നടത്തിയ സംഭവത്തില്‍ പൊലിസ് അന്വേഷണം തളിപ്പറമ്പിലേക്കു കേന്ദ്രീകരിച്ചു. തളിപ്പറമ്പില്‍ നിന്നു കവര്‍ന്ന മോട്ടോര്‍ സൈക്കിളിലെത്തിയ മോഷ്ടാക്കളാണു പടന്നക്കാട്ട് വീടുകളില്‍ കവര്‍ച്ച നടത്തിയതെന്നു പൊലിസ് അന്വേഷണത്തില്‍ കണ്ടെത്തിയതിനെ തുടര്‍ന്നാണിത്.
പടന്നക്കാട് ഒഴിഞ്ഞവളപ്പില്‍ മോഷ്ടാക്കള്‍ ഉപേക്ഷിച്ചതെന്നു കരുതുന്ന കെ.എല്‍.59 . ബി. 8416 നമ്പര്‍ ഹീറോ ഹോണ്ട ബൈക്ക് പൊലിസ് കസ്റ്റഡിയിലെടുത്തിട്ടുണ്ട്. ഇക്കഴിഞ്ഞ വ്യാഴാഴ്ച തളിപ്പറമ്പില്‍ നിന്നു മോഷണം പോയ ബൈക്കാണിതെന്ന് അന്വേഷണത്തില്‍ കണ്ടെത്തുകയും ചെയ്തു.
ബൈക്ക് കാണാതായതു സംബന്ധിച്ച് ഉടമ തളിപ്പറമ്പ് പൊലിസില്‍ നല്‍കിയ പരാതിയില്‍ കേസെടുത്ത് അന്വേഷണം നടത്തിവരുന്നതിനിടെയാണ് ഈ ബൈക്ക് കാഞ്ഞങ്ങാട് ഭാഗത്ത് ഉപേക്ഷിച്ച നിലയില്‍ കണ്ടെത്തിയത്. പടന്നക്കാട് അനന്തംപള്ളയിലെ ഗള്‍ഫുകാരനായ ഇന്ദുലാല്‍, കൊട്രച്ചാലിലെ പരേതനായ റിട്ട. ഡിവൈ.എസ്.പി പ്രഭാകരന്റെ ഭാര്യ വാസന്തി, ഞാണിക്കടവിലെ ഫാസിറ എന്നിവരുടെ വീടുകളിലാണ് കവര്‍ച്ച നടന്നത്.
പടന്നക്കാട് കുറുന്തൂരിലെ അനീഷിന്റെ ബൈക്കും സംഭവ ദിവസം മോഷണം പോയിട്ടുണ്ട്. രണ്ടംഗസംഘമാണു കവര്‍ച്ചക്ക് പിന്നിലെന്ന സൂചനയാണ് അന്വേഷണ സംഘത്തിനു ലഭിച്ചിട്ടുള്ളത്. തളിപ്പറമ്പില്‍ നിന്നു മോഷ്ടിച്ച ബൈക്ക് ഉപേക്ഷിച്ച് അനീഷിന്റെ ബൈക്കില്‍ കവര്‍ച്ചാ സംഘം രക്ഷപ്പെട്ടതായാണു പൊലിസ് നിഗമനം.