ഇന്ത്യയില്‍ ആക്രമണം നടത്താനുള്ള ഗൂഢാലോചനകളില്‍ സിങ്ങിന് പങ്കുണ്ടെന്ന് കുറ്റപത്രം

 

ന്യൂഡല്‍ഹി: ഭീകരര്‍ക്കൊപ്പം പിടിയിലായ ജമ്മു കശ്മിരിലെ മുന്‍ ഡി.എസ്.പി ദേവീന്ദര്‍ സിങിനും മറ്റ് അഞ്ചു പേര്‍ക്കുമെതിരേ ദേശീയ അന്വേഷണ ഏജന്‍സി (എന്‍.ഐ.എ) കുറ്റപത്രം സമര്‍പ്പിച്ചു. പിടിയിലായി അഞ്ചു മാസത്തിന് ശേഷമാണ് യു.എ.പി.എ കേസില്‍ എന്‍.ഐ.എ കുറ്റപത്രം സമര്‍പ്പിച്ചത്. ഇന്ത്യയില്‍ ആക്രമണം നടത്താന്‍ പാകിസ്താന്‍ കേന്ദ്രമായി പ്രവര്‍ത്തിക്കുന്ന ഹിസ്ബുല്‍ മുജാഹിദീന്‍ ഭീകരസംഘടന നടത്തിയ ഗൂഢാലോചനകളില്‍ സിങിന് പങ്കുള്ളതായി കുറ്റപത്രത്തില്‍ പറയുന്നു.

തന്ത്ര പ്രധാന വിവരങ്ങള്‍ ലഭിക്കുന്നതിന് വേണ്ടി പാക് ഉദ്യോഗസ്ഥര്‍ ദേവീന്ദര്‍സിങിനെ ഉപയോഗപ്പെടുത്തുകയായിരുന്നു എന്നും കുറ്റപത്രത്തിലുണ്ട്. സിങിന് ഡല്‍ഹിയിലെ പാക് ഹൈക്കമ്മീഷന്‍ ഉദ്യോഗസ്ഥരുമായി ബന്ധമുണ്ട്. സുരക്ഷിതമായ സാമൂഹിക മാധ്യമങ്ങള്‍ ഇതിനായി ഇവര്‍ ഉപയോഗപ്പെടുത്തിയതായും എന്‍.ഐ.എ ചൂണ്ടിക്കാട്ടുന്നു.  

ദേവീന്ദര്‍ സിങിനൊപ്പം പിടിയിലായ ഹിസ്ബുല്‍ ഭീകരരായ നവീദ് മുഷ്താഖ്, റാഫി അഹമ്മദ് റാത്തര്‍, നിയമ വിദ്യാര്‍ഥി ഇര്‍ഫാന്‍ ഷാഫി മിര്‍ എന്നിവര്‍ക്കെതിരേയും മറ്റ് രണ്ട് പ്രതികളായ തന്‍വീര്‍ അഹമ്മദ് വാനി, സയ്ദ് ഇര്‍ഫാന്‍ അഹമ്മദ് എന്നിവര്‍ക്കെതിരേയും കുറ്റപത്രം സമര്‍പ്പിച്ചിട്ടുണ്ട്. 

  നേരത്തെ നിശ്ചിത സമയപരിധിക്കുള്ളില്‍ ഡല്‍ഹി പൊലിസ് കുറ്റപത്രം സമര്‍പ്പിക്കാതിരുന്ന സാഹചര്യത്തില്‍ ദേവീന്ദര്‍ സിങിന് ഡല്‍ഹി കോടതി ജാമ്യം അനുവദിച്ചിരുന്നു. ഹിസ്ബുല്‍ മുജാഹിദീന്‍ ഭീകരരെ സുരക്ഷിതരായി തന്റെ വാഹനത്തില്‍ കൊണ്ടുപോകുന്നതിനിടെയായിരുന്നു  ജനുവരി 11ന് തെക്കന്‍ കശ്മിരിലെ കുല്‍ഗാം ജില്ലയില്‍നിന്ന് ദേവീന്ദര്‍ സിങ് പിടിയിലായത്.