ലണ്ടന്‍: ഇംഗ്ലീഷ് എഫ്.എ കപ്പ് ഫൈനലില്‍ ചെല്‍സി- ആഴ്‌സണല്‍ പോരാട്ടം. സെമിയില്‍ ചെല്‍സി 4-2ന് ടോട്ടനം ഹോട്‌സ്പറിനേയും ആഴ്‌സണല്‍ 2-1ന് മാഞ്ചസ്റ്റര്‍ സിറ്റിയേയും വീഴ്ത്തി.
അധിക സമയത്തേക്ക് നീണ്ട പോരാട്ടത്തില്‍ അലക്‌സിസ് സാഞ്ചസ് നേടിയ നിര്‍ണായക ഗോളിലാണ് ആഴ്‌സണല്‍ വിജയിച്ചത്. ആദ്യ പകുതി ഗോള്‍ പിറക്കാതെ പോയപ്പോള്‍ 62ാം മിനുട്ടില്‍ അഗ്യെറോയുടെ ഗോളില്‍ സിറ്റി മുന്നിലെത്തി.
എന്നാല്‍ 71ാം മിനുട്ടില്‍ നാചോ മോണ്‍റിയല്‍ ഗണ്ണേഴ്‌സിനെ ഒപ്പമെത്തിച്ചു. നിശ്ചിത സമയത്ത് മത്സരം 1-1ന് സമനിലയായതോടെ അധിക സമയത്തേക്ക് നീണ്ടു. കളിയുടെ 101ാം മിനുട്ടില്‍ സാഞ്ചസ് വിജയ ഗോള്‍ നേടി.
വില്ല്യന്‍ നേടിയ ഇരട്ട ഗോളുകളും ഏദന്‍ ഹസാദ്, മാറ്റിച് എന്നിവരുടെ നിര്‍ണായക ഗോളുകളുമാണ് ചെല്‍സിക്ക് ജയമൊരുക്കിയത്.
ആദ്യ പകുതിയില്‍ വില്ല്യന്‍ നേടിയ ഇരട്ട ഗോളിന് ഹാരി കെയ്ന്‍, അല്ലി എന്നിവരിലൂടെ ടോട്ടനം മറുപടി പറഞ്ഞെങ്കിലും ഹസാദിന്റേയും മാറ്റിചിന്റേയും ഗോളുകള്‍ കളിയുടെ ഗതി നിര്‍ണയിച്ചു. മെയ് 27ന് നടക്കുന്ന ഫൈനലില്‍ ചെല്‍സിയും ആഴ്‌സണലും ഏറ്റുമുട്ടും.