കഠിനംകുളം: കഠിനംകുളം വില്ലേജ് ഓഫിസ് ഹൈടെക്കായി. എന്നാല്‍ ഓഫിസില്‍ ആകെയുള്ളത് ഒരു വില്ലേജ് ഓഫിസറും വില്ലേജ് ഫീല്‍ഡ് അസിസ്റ്റന്റും മാത്രം. തീരദേശ വില്ലേജ് ആയ ഇവിടെ എത്തുന്നവര്‍ക്കു സര്‍ട്ടിഫിക്കറ്റുകളും മറ്റും കൊടുക്കുവാന്‍ പെടാപാടുപെടുകയാണ്. 

രാവിലെ ഒന്‍പത് മണിയ്ക്കു ജോലിക്കെത്തുന്ന ഇരുവര്‍ക്കും നിന്നും തിരിയാന്‍ സമയമില്ലെന്നു മാത്രമല്ല പലപ്പോഴും ഫയലുകള്‍ വീട്ടില്‍കൊണ്ടുപോയി രാത്രി 11 വരെ ഇരുന്ന് സര്‍ട്ടിഫിക്കറ്റുകളും മറ്റും എഴുതിവെയ്‌ക്കേണ്ട ഗതികേടിലാണ് ഇവിടുത്തെ വനിത വില്ലേജ് ഓഫിസര്‍. മൊത്തത്തില്‍ വില്ലേജ് ഓഫിസര്‍ അടക്കം ആറു ജീവനക്കാരാണ് വേണ്ടത്. മത്സ്യ ബന്ധനക്കാരും കയര്‍ തൊഴിലാളികളും തിങ്ങിപാര്‍ക്കുന്ന വില്ലേജില്‍ വിവിധ ക്ഷേമപദ്ധതികള്‍ക്ക് അപേക്ഷിക്കാന്‍ വേണ്ട സര്‍ട്ടിഫിക്കറ്റുകള്‍ നല്‍കേണ്ടത് ഇവിടെ നിന്നാണ്.
പ്രത്യകിച്ച് പ്രകൃതിക്ഷോഭം വന്ന് വള്ളവും വലയും നശിക്കുകയോ ആളിനു ജീവാപയമോ ഉണ്ടായാല്‍ അതുപരിശോധിച്ച് ആവശ്യമുള്ള സര്‍ട്ടിഫിക്കറ്റുകള്‍ നല്‍കേണ്ടത് വില്ലേജ് ഓഫിസറാണ്. മുമ്പ് പൊട്ടിപൊളിഞ്ഞ കെട്ടിടത്തിലാണ് വില്ലേജ് ഓഫിസ് പ്രവര്‍ത്തിച്ചിരുന്നത്. പത്രവാര്‍ത്തയെതുടര്‍ന്ന് സംസ്ഥാനത്തെ ഹൈടെക് വില്ലേജ് ഓഫിസുകളുടെ പട്ടികയില്‍ ഉള്‍പ്പെടുത്തി ഇവിടെയും അത്യാധുനിക സംവിധാനമുള്ള കെട്ടിടം നിര്‍മിച്ചു.
എന്നാല്‍ ആവശ്യത്തിന് ജീവനക്കാരില്ലാത്തതിനാല്‍ ഹൈടെക് വില്ലേജ് ഓഫിസിന്റെ സേവനം യഥാസമയം കിട്ടാനാവാത്ത അവസ്ഥയിലാണ് നാട്ടുകാര്‍. റവന്യൂ വകുപ്പ് ഇടപെട്ട് ആവശ്യത്തിനുള്ള ജീവനക്കാരെ അനുവദിച്ച് നിലവിലുള്ള ബുദ്ധിമുട്ട് ഒഴിവാക്കണമെന്നാണ് നാട്ടുകാരുടെ ആവശ്യം.