കോവളം: കുടിവെള്ളം കിട്ടാക്കനിയായ കോവളം മേഖലയില്‍ ഡെങ്കിയും മറ്റ് പകര്‍ച്ചപ്പനികളും പടരുന്നു. ഒരാഴ്ചക്കിടെ അഞ്ചു പേരാണ് ഡെങ്കിപ്പനിയുമായി  വിഴിഞ്ഞം കമ്മ്യൂണിറ്റി  ഹെല്‍ത്ത് സെന്ററില്‍ ചികിത്സ തേടിയെത്തിയത്. അഞ്ചുപേരും വനിതകളാണ് .ആരോഗ്യ സ്ഥിതി മോശമായതിനെ തുടര്‍ന്ന്  നാലുപേരെ  തിരുവനന്തപുരം മെഡിക്കല്‍കോളജിലേക്ക്  മാറ്റി.   മറ്റു പകര്‍ച്ചപ്പനികളുമായി നിരവധി പേരാണ്  മുക്കോല പ്രഥമിക ആരോഗ്യ കേന്ദ്രത്തിലും,വിഴിഞ്ഞം സി.എച്ച്.സി.യിലും ദിവസവും  ചികിത്സ തേടിയെത്തുന്നുണ്ട്.
 ഡെങ്കിപ്പനി സ്ഥിരീകരിച്ച അഞ്ച് പേരും രൂക്ഷമായ  ജലക്ഷാമം നേരിടുന്ന പ്രദേശങ്ങളിലുള്ളവരാണെന്ന് ആരോഗ്യ വകുപ്പ് അധികൃതര്‍ പറയുന്നു. ജലക്ഷാമം കാരണം  സ്വകാര്യ ടാങ്കറുകളില്‍ എത്തിക്കുന്ന വെള്ളം വിലകൊടുത്തുവാങ്ങി ദിവസങ്ങളോളം പാത്രങ്ങളില്‍ സൂക്ഷിച്ചാണ്  ഈ മേഖലയിലുള്ളവര്‍ ഉപയോഗിക്കുന്നത്. ഇത് കൊതുക് പെരുകുന്നതിന് ഇടയാക്കുന്നുണ്ട്.
 ജല അതോറിറ്റി ഈ മേഖലയില്‍ വിതരണം ചെയ്യുന്ന കുടിവെള്ളത്തെ കുറിച്ചും വ്യാപക പരാതികളാണുള്ളത്. വല്ലപ്പോഴും വിതരണം ചെയ്യുന്ന വെള്ളം ചെളികലര്‍ന്ന് ദുര്‍ഗന്ധം വമിക്കുന്ന രീതിയിലാണ് ജനങ്ങള്‍ക്ക് ലഭിക്കുന്നത്.ഈ വെള്ളം ഉപയോഗിച്ചാല്‍ മഞ്ഞപ്പിത്തം അടക്കമുള്ള  ഗുരുതരമായ ആരോഗ്യ പ്രശ്‌നങ്ങളുണ്ടായേക്കുമെന്ന് ആരോഗ്യ രംഗത്ത് പ്രവര്‍ത്തിക്കുന്നവര്‍ പറയുന്നു.
മേഖലയില്‍ അടിയന്തര രോഗപ്രതിരോധ പ്രവര്‍ത്തനങ്ങള്‍ നടത്തുന്നതിനായി അരോഗ്യവകുപ്പ് അധികൃതരുടെ പ്രത്യേക യോഗം കഴിഞ്ഞ ദിവസം  വിഴിഞ്ഞം സി.എച്ച്.സി.യില്‍  ചേര്‍ന്നു. പ്രതിരോധ പ്രവര്‍ത്തനങ്ങള്‍ ശക്തമാക്കുന്നതിനുള്ള കര്‍മ പരിപാടികള്‍ യോഗം ആവിഷികരിച്ചതായി ആരോഗ്യ വകുപ്പ് അധികൃതര്‍ പറഞ്ഞു.
35 പേരോളമുള്ള ആരോഗ്യ പ്രവര്‍ത്തകരെ  പതിനൊന്ന് ഗ്രൂപ്പുകളാക്കി തിരിച്ച് വിവിധ പ്രദേശങ്ങളില്‍ കൊതുകിന്റെ ഉറവിട നശീകരണം, ഫോഗിങ്, ബോധവല്‍ക്കരണം തുടങ്ങിയ  പ്രതിരോധ പ്രവര്‍ത്തനങ്ങള്‍ നടത്തും. ഡെങ്കിപ്പനി കണ്ടെത്തിയവരുടെ വീട്ടിനുള്ളില്‍ പ്രത്യേക മരുന്ന് സ്‌പ്രേ ചെയ്യലും ഫോഗിങ്ങും നടത്തി തുടങ്ങിയിട്ടുണ്ട്.