പാലക്കാട്: വേനലില്‍ പകര്‍ച്ചവ്യാധികള്‍ പടരാനുള്ള സാധ്യത കണക്കിലെടുത്ത് ഭാരതീയ ചികിത്സാ വകുപ്പ് പ്രതിരോധ പ്രവര്‍ത്തനങ്ങള്‍ ശക്തമാക്കി. ജില്ലയിലെ വിവിധയിടങ്ങളില്‍ ബോധവത്കരണ ക്ലാസുകളും മെഡിക്കല്‍ ക്യാംപുകളും സംഘടിപ്പിക്കുന്നതിന് 11 ഏരിയാതല ടാസ്‌ക് ഫോഴ്‌സുകള്‍ രൂപീകരിച്ചു. പകര്‍ച്ചവ്യാധി പടരുന്ന പ്രദേശങ്ങളില്‍ ടാസ്‌ക് ഫോഴ്‌സുകളുടെ സേവനം ലഭ്യമാക്കുന്നതിന് ജനപ്രതിനിധികള്‍, സന്നദ്ധ സംഘടനകള്‍, സ്‌കൂളുകള്‍, എന്നിവര്‍ക്ക് 0491 2544296, 9446520271 നമ്പറില്‍ ബന്ധപ്പെടാം. പകര്‍ച്ചവ്യാധി പ്രതിരോധ പ്രവര്‍ത്തനങ്ങള്‍ക്കും ചികിത്സയ്ക്ക് ആവശ്യമായ മരുന്നുകളും ഡോക്ടര്‍മാരും ആശുപത്രികളില്‍ ലഭ്യമാണ്.
ചുക്ക്, കൊത്തമല്ലി, ജീരകം എന്നിവയിട്ട തിളപ്പിച്ചാറിയ വെള്ളം മാത്രം കുടിക്കുക. കൊതുക് നിര്‍മാര്‍ജനത്തിനായി വെളുത്തുള്ളിതൊലി, കുന്തിരിക്കം, ശീമക്കൊന്ന ഇല, വേപ്പില എന്നിവ കനലിലിട്ട് പുകയ്ക്കുക. ഭക്ഷണ പാത്രങ്ങള്‍ അടച്ചുവെക്കുക, വെള്ളം കെട്ടിനില്‍ക്കുന്ന സ്ഥലങ്ങളില്‍ വേപ്പെണ്ണയും പുകയില കഷായവും ചേര്‍ത്ത് തളിക്കുക എന്നീ നിര്‍ദേശങ്ങളും പകര്‍ച്ചവ്യാധി പ്രതിരോധത്തിനായി ഭാരതീയ ചികിത്സാ വകുപ്പ്  മുന്നോട്ടുവെച്ചു.