തൃശൂര്‍: സുരേഷ് ഗോപി തെരഞ്ഞെടുപ്പ് ചട്ടലംഘനം നടത്തിയെന്ന തൃശൂര്‍ ജില്ലാ കലക്ടറുടെ നിലപാട് അസംബന്ധമെന്ന് ബി.ജെ.പി നേതാവ് അഡ്വ. ബി. ഗോപാലകൃഷ്ണന്‍. ബി.ജെ.പി തെരഞ്ഞെടുപ്പ് കമ്മിറ്റി ഓഫിസില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.
കലക്ടറുടെ നോട്ടിസിന് ഉടന്‍ മറുപടി നല്‍കും. ചുരുങ്ങിയ സമയത്തിനുള്ളില്‍ എന്‍.ഡി.എ സ്ഥാനാര്‍ഥിക്ക് ലഭിക്കുന്ന വരവേല്‍പ്പില്‍ പിണറായിയും കോണ്‍ഗ്രസും അമ്പരന്നിരിക്കുകയാണ്. തമിഴിലും പാലിയിലും അയ്യന്‍ എന്ന വാക്കിന്റെ അര്‍ഥം അച്ഛന്‍, ചേട്ടന്‍, ഭിക്ഷു എന്നൊക്കെയാണ്.
നവോത്ഥാന മതിലില്‍ പങ്കെടുത്ത കലക്ടര്‍ പിണറായി സര്‍ക്കാരിന് ഓശാന പാടുന്നത് തെളിയിച്ചയാളാണ്.
സര്‍ക്കാരിന്റെ ദത്തുപുത്രി ആകാനാണ് കലക്ടര്‍ ശ്രമിക്കുന്നത്. ശബരിമല ബി.ജെ.പിയുടെ പ്രചാരണ വിഷയം തന്നെയാണ്. കലക്ടറോ കമ്മിഷനറോ തടയാന്‍ ശ്രമിച്ചാലും തങ്ങളത് ജനമധ്യത്തില്‍ ഉയര്‍ത്തുക തന്നെ ചെയ്യുമെന്നും ഗോപാലകൃഷ്ണന്‍ പറഞ്ഞു.