തിരുവനന്തപുരം: ലോക്‌സഭാ തെരഞ്ഞെടുപ്പിനുള്ള ഒരുക്കങ്ങളുമായി സി.പി.എം പ്രവര്‍ത്തനം തുടങ്ങി.ജില്ലാ, മണ്ഡലം കമ്മിറ്റികളുടെ പ്രവര്‍ത്തനത്തിന് പിന്നാലെ ബൂത്ത് കമ്മിറ്റികളുടെ പ്രവര്‍ത്തനവും സജീവമാക്കാനാണ് തീരുമാനം.
പാര്‍ട്ടി കോണ്‍ഗ്രസ് അംഗീകരിച്ച റിപ്പോര്‍ട്ട് അവതരിപ്പിക്കുന്നതിനായി ലോക്കല്‍ കമ്മിറ്റികള്‍തോറും റിപ്പോര്‍ട്ടിങ്ങ് നടത്തിയിരുന്നു. ഓരോ ബ്രാഞ്ചുകളുടേയും പ്രവര്‍ത്തനവും ആ മേഖലയില്‍ പാര്‍ട്ടിയുടെ ദൗര്‍ബല്യങ്ങള്‍ മനസിലാക്കുന്നതിനും പ്രത്യേക ചുമതല നല്‍കി ഏരിയാ കമ്മിറ്റിയംഗത്തെ പങ്കെടുപ്പിച്ച് യോഗവും നടന്നിരുന്നു. ഇങ്ങനെ ശേഖരിക്കുന്ന റിപ്പോര്‍ട്ടുകള്‍ ക്രോഡീകരിച്ച് ഏരിയാ കമ്മിറ്റികള്‍ ജില്ലാ കമ്മിറ്റികള്‍ക്ക് നല്‍കും ഇത് വിലയിരുത്തിയ ശേഷം ഓരോ പ്രദേശത്തിനും ആവശ്യമായ രീതിയില്‍ പ്രവര്‍ത്തനം സംഘടിപ്പിക്കാനാണ് സി.പി.എം തീരുമാനിച്ചിട്ടുള്ളത്. ചെങ്ങന്നൂര്‍ ഉപതെരഞ്ഞെടുപ്പില്‍ മികച്ച വിജയം നേടുന്നതിന് ആവിഷ്‌കരിച്ച അതേ തന്ത്രമാണ് ലോക്‌സഭാ തെരഞ്ഞെടുപ്പിലും സി.പി.എം പ്രയോഗിക്കുന്നത്. പ്രാദേശിക വിലയിരുത്തലുകള്‍ നടത്തിയതിനു ശേഷമാണ് ചെങ്ങന്നൂരില്‍ ഓരോ മേഖലയിലും നടത്തേണ്ട പ്രവര്‍ത്തനങ്ങള്‍ക്ക് സി.പി.എം രൂപം നല്‍കിയത്.