പുല്‍പ്പള്ളി: ചാമപ്പാറ പ്രദേശത്ത് കാട്ടാന വ്യാപകമായി കൃഷി നശിപ്പിച്ചു.
നെടുന്താനം ആന്റോ, പ്ലാവനാംകുഴി ഷിബു ജോണ്, ജോസ് പുത്തന്‍പുര, രമേശന്‍, രേണുക എന്നിവരുടെ തെങ്ങ്, വാഴ, കാപ്പി, കുരുമുളക് തുടങ്ങിയ കൃഷികളാണ് നശിപ്പിച്ചത്.
വനാതിര്‍ത്തിയില്‍ സ്ഥാപിച്ച വൈദ്യുതിവേലിയും ട്രഞ്ചും തകര്‍ത്താണ് ആന കൃഷിയിടത്തില്‍ എത്തിയത്. ലക്ഷങ്ങളുടെ കൃഷിനാശമാണുണ്ടായത്. കര്‍ണ്ണാടക വനത്തില്‍ നിന്നും എത്തിയ ഒറ്റയാനാണ് കൃഷി നശിപ്പിച്ചതെന്നാണ് കര്‍ഷകര്‍ പറയുന്നത്.
നെടുന്താനം ആന്റോയുടെ കൃഷിയിടത്തിലാണ് വ്യാപക നഷ്ടമുണ്ടായത്. കുലയ്ക്കാറായ വാഴകളും തെങ്ങുകളുമാണ് കൂടുതല്‍ നശിപ്പിച്ചത്. പാതിരി നോര്‍ത്ത് ഫോറസ്റ്റര്‍ ബഷീറിന്റെ നേതൃത്വത്തില്‍ വനപാലകര്‍ സ്ഥലത്തെത്തി നാശനഷ്ടം വിലയിരുത്തി. പ്രദേശത്തെ വന്യമൃഗശല്യം പരിഹരിക്കുന്നതിന് അടിയന്തര പരിഹാരം കാണുമെന്ന് വനംവകുപ്പ് ഉദ്യോഗസ്ഥര്‍ പറഞ്ഞു.