പാലക്കാട്: തെരഞ്ഞെടുപ്പ് പ്രചാരണ വാഹനവ്യൂഹത്തില്‍ നിന്ന് വടിവാള്‍ വീണെന്ന വാര്‍ത്ത വ്യാജമാണെന്നും വാഹനത്തില്‍ നിന്ന് താഴെ വീണത് വടിവാളല്ല കര്‍ഷകന്റെ പണി ആയുധമാണെന്നുമാണ് ഇടതുപക്ഷത്തിന്റെ മറുപടി. ഇതിനെതിരേ പാലക്കാട്ടെ എല്‍ .ഡി.എഫ് സ്ഥാനാര്‍ഥി എം.ബി രാജേഷ് മുഖ്യ തെരഞ്ഞെടുപ്പ് ഓഫീസര്‍ക്കും പാലക്കാട് എസ്.പിക്കും പരാതിയും നല്‍കി. അപകീര്‍ത്തിപ്പെടുത്തുന്ന പ്രചാരണം നടത്തുന്നതായി കാണിച്ചാണ് ഇടതു മുന്നണി സ്ഥാനാര്‍ഥി പരാതി നല്‍കിയിരിക്കുന്നത്.

വെള്ളിയാഴ്ചയാണ് സംഭവം. വൈകുന്നേരം എല്‍.ഡി.എഫ്. സ്ഥാനാര്‍ഥി എം.ബി.രാജേഷ് ഒറ്റപ്പാലം പുലാപ്പറ്റയില്‍ പര്യടനം നടത്തുന്നതിനിടെയാണ് അദ്ദേഹത്തെ അനുഗമിച്ചിരുന്നവരില്‍ ഒരാളുടെ ബൈക്കില്‍ നിന്ന് ആയുധം താഴെ വീണത്. തൊട്ടു പിന്നാലെ വന്ന ബൈക്ക് യാത്രികര്‍ ആയുധം താഴെ വീണ സ്‌കൂട്ടറിന് മറ തീര്‍ക്കുകയും താഴെ വീണ ആയുധം വാഹനത്തില്‍ വെച്ച് യാത്ര തുടരുകയുമായിരുന്നു.

എന്നാല്‍ ഇത് വടിവാള്‍ ആണെന്നായിരുന്നു കോണ്‍ഗ്രസിന്റെ ആരോപണം. വാഹനത്തില്‍ നിന്ന് ആയുധം വീണ സംഭവം തെരഞ്ഞെടുപ്പ് അട്ടിമറിക്കാനുള്ള പ്രവര്‍ത്തനമാണെന്ന് ചൂണ്ടിക്കാട്ടി യൂത്ത് കോണ്‍ഗ്രസ് മുഖ്യ തെരഞ്ഞെടുപ്പ് ഓഫീസര്‍ക്ക് പരാതിയും നല്‍കി. തെരഞ്ഞെടുപ്പ് കമ്മിഷന്‍ ടിക്കറാം മീണ വിശദീകരണവും തേടിയിരിക്കുകയാണ്. ഇതിനിടെയാണ് ഇത് വടിവാള്‍ അല്ലെന്നും കൃഷി ആവശ്യത്തിന് ഉപയോഗിക്കുന്ന മടവാള്‍ ആണെന്നും ഇടതു നേതൃത്വത്തിന്റെ വിശദീകരണം. നടത്തുന്നത് വ്യാജ പ്രചാരണമാണെന്ന രോപണവുമായി ഇടതുമുന്നണി സ്ഥാനാര്‍ഥി തന്നെ പരാതി നല്‍കിയിരിക്കുന്നത്. വാഴക്കുല വെട്ടി കടയില്‍ കൊടുത്തശേഷം എല്‍.ഡി.എഫ് സ്ഥാനാര്‍ഥിയുടെ സ്വീകരണത്തില്‍ പങ്കെടുത്ത കര്‍ഷകനെ കോണ്‍ഗ്രസും യു.ഡി.എഫും അപമാനിക്കുകയാണെന്നാണ് ഇടതുപക്ഷത്തിന്റെ ആരോപണം. മാരകായുധങ്ങളുമായി പ്രചാരണത്തിന് എത്തിയെന്ന് ആരോപിച്ച് കര്‍ഷക സമൂഹത്തെ മുഴുവനായും അപമാനിക്കാനുള്ള ശ്രമമാണ് നടക്കുന്നതെന്നും ഇടതുപക്ഷം ആരോപിക്കുന്നു.