ഇസ്‌ലാമാബാദ്: മുംബൈ ഭീകരാക്രമണ കേസിലെ ആസൂത്രകനും ലഷ്‌കറെ ത്വയ്ബ ഓപറേഷന്‍ കമാന്‍ഡറുമായ സഖീഉ റഹ്്മാന്‍ ലഖ്‌വിയുടെ ജാമ്യം റദ്ദാക്കണമെന്ന് പാക് അന്വേഷണ ഏജന്‍സി കോടതിയില്‍. ഫെഡറല്‍ അന്വേഷണ ഏജന്‍സി(എഫ്.ഐ.എ) ആണ് ഈ ആവശ്യമുന്നയിച്ച് ഇസ്‌ലാമാബാദ് ഹൈക്കോടതിയെ സമീപിച്ചത്. എഫ്.ഐ.എയുടെ ഹരജി പരിഗണിച്ച കോടതി ഡിവിഷന്‍ ബെഞ്ച് മുംബൈ കേസുമായി ബന്ധപ്പെട്ട രേഖകള്‍ രണ്ടാഴ്ചക്കുള്ളില്‍ സമര്‍പ്പിക്കണമെന്ന് ആവശ്യപ്പെട്ടു.
മുംബൈ ആക്രമണ കേസ് തീവ്രവാദി വിരുദ്ധ കോടതിയില്‍ (എ.ടി.സി) നടക്കുന്നതിനാല്‍ രേഖകള്‍ ഇവിടെയാണുള്ളത്. കേസില്‍ ലഖ്‌വിക്ക് പുറമെ അബ്ദുല്‍ വാജിദ്, മസ്ഹര്‍ ഇക്ബാല്‍, ഹമദ് അമീന്‍ സാദിഖ്, ശാഹിത് ജാമില്‍ റിയാസ്, ജാമില്‍ അഹമ്മദ്, യൂനിസ് അന്‍ജും എന്നിവരാണ് വിചാരണ നേരിടുന്നത്. ഇവര്‍ക്കെതിരേ 2009ല്‍ നടന്ന മുംബൈ ആക്രമണം നടത്തല്‍, കൊലപാതക പ്രേരണ, കൊലപാതക ശ്രമം തുടങ്ങിയ കുറ്റങ്ങളാണ് ചുമത്തിയിരിക്കുന്നത്. 2014 ഡിസംബര്‍ 18നാണ് ലഖ്‌വിക്ക് എ.ടി.സി മുന്‍കൂര്‍ ജാമ്യം നല്‍കിയത്. ലഷ്‌കറെ ത്വയ്ബയുടെ പത്ത് തീവ്രവാദികളുടെ നേതൃത്വത്തില്‍ മുംബൈയില്‍ നടത്തിയ ആക്രമണത്തില്‍ 166 പേര്‍ കൊല്ലപ്പെട്ടിരുന്നു. ഒന്‍പത് തീവ്രവാദികളും ആക്രമണത്തില്‍ കൊല്ലപ്പെട്ടു. പരുക്കുകളോടെ രക്ഷപ്പെട്ട അജ്മല്‍ കസബിനെ ഇന്ത്യ പിന്നീട് തൂക്കിലേറ്റിയിരുന്നു.