തലപ്പുഴ (വയനാട്): യു.പി.എ സര്‍ക്കാര്‍ അധികാരത്തില്‍ വന്നാല്‍ രാഹുല്‍ ഗാന്ധി ആദ്യം ഒപ്പിടുന്ന ഫയല്‍ കര്‍ഷകരുടെ കടം എഴുതിത്തള്ളുന്നത് ആയിരിക്കുമെന്ന് കോണ്‍ഗ്രസ് പ്രവര്‍ത്തകസമിതി അംഗം എ.കെ ആന്റണി. യു.പി.എ സര്‍ക്കാര്‍ അധികാരത്തില്‍ വന്നാല്‍ ഇന്ത്യയില്‍ ഒരു കര്‍ഷകനും ആത്മഹത്യ ചെയ്യേണ്ടി വരില്ലന്നും ഒരു കര്‍ഷകനും ജയിലില്‍ പോകേണ്ടി വരില്ലന്നും തെരഞ്ഞെടുപ്പ് പ്രചാരണത്തിനെത്തിയ അദ്ദേഹം മാധ്യമപ്രവര്‍ത്തകരോട് പറഞ്ഞു.
കഴിഞ്ഞ യു.പി.എ കാലത്ത് 52,000 കോടി രൂപയുടെ കാര്‍ഷിക കടം എഴുതിത്തള്ളി. മോദി സര്‍ക്കാര്‍ അര്‍ഹതപ്പെട്ടതു പോലും കര്‍ഷകര്‍ക്ക് നല്‍കാത്തതിനാല്‍ കൃഷി ആദായകരമല്ലാതായതോടെ കര്‍ഷകര്‍ കൃഷി ഉപേക്ഷിച്ചു പോയി.

രാജ്യം മുഴുവന്‍ വിവിധ തുറകളിലെ സാധാരണക്കാരുമായി മുന്‍ ധനകാര്യ മന്ത്രി പി. ചിദംബരത്തിന്റെ നേതൃത്വത്തില്‍ പലതവണ ചര്‍ച്ച ചെയ്താണ് കര്‍ഷകര്‍ക്കും സാധാരണക്കാര്‍ക്കും വേണ്ടിയുള്ള യു.പി.എയുടെ പ്രകടന പത്രിക തയാറാക്കിയത്. അടച്ചിട്ട മുറിയിലിരുന്നോ പൊളിറ്റ് ബ്യുറോ ചേര്‍ന്നോ തയാറാക്കിയതല്ല. മോദിയെ താഴെ ഇറക്കുന്നതിനൊപ്പം ഇനി രണ്ടു വര്‍ഷമെങ്കിലും ജനങ്ങള്‍ക്കു വേണ്ടി ഭരിക്കാന്‍ പിണറായിക്കൊരു ഷോക്കും ശിക്ഷയും ആയിരിക്കും ഈ തെരഞ്ഞെടുപ്പെന്നും അദ്ദേഹം പറഞ്ഞു.