കല്ലമ്പലം: റോഡിന്റെ വശങ്ങളില്‍ ടോറസ് ലോറികള്‍ പാര്‍ക്ക് ചെയ്തതിനെത്തുടര്‍ന്ന് ഗതാഗതം തടസപ്പെട്ടു.
ദേശീയ പാതയില്‍ ചാത്തന്‍പാറ നിന്നും നെടുമ്പറമ്പിലേക്ക് പോകുന്ന പാതയുടെ ഇരുവശങ്ങളിലുമാണ് ടോറസ് ലോറികള്‍ പാര്‍ക്ക് ചെയ്ത് ഗതാഗത തടസം സൃഷ്ടിച്ചത്.
ചപ്പാത്ത് മുക്കില്‍ നിന്നും മണ്ണ് കയറ്റാന്‍ വന്ന എട്ടോളം ലോറികളാണ് റോഡ് മാര്‍ക്കിങ് ഉള്‍പ്പെടെ മറച്ചുകൊണ്ട് വീതികുറഞ്ഞ റോഡില്‍ വളവുകളില്‍ പാര്‍ക്ക് ചെയ്തത്. നെടുംപറമ്പിലെ ഒരു സ്വകാര്യ എന്‍ജിനീയറിംഗ് കോളജിലെ എന്‍ട്രന്‍സ് പരീക്ഷ കൂടിയായതോടെ റോഡിലെ വാഹനത്തിരക്ക് വര്‍ധിച്ചു. തുടര്‍ന്ന് വിവരമറിഞ്ഞ് ആറ്റിങ്ങല്‍ ആര്‍.ടി.ഒ അധികൃതര്‍ സ്ഥലത്തെത്തുകയും ടോറസ് ലോറികള്‍ക്ക് പിഴ ചുമത്തുകയും ചെയ്തു.