കാളികാവ്: കാളികാവ് പാലത്തിന് സമീപമുള്ള പുറമ്പോക്ക് ഭൂമി അളക്കല്‍ തുടങ്ങി. കയ്യേറ്റം ഒഴിപ്പിച്ച് സ്ഥലം ഗ്രാമപഞ്ചായത്ത് ഏറ്റെടുക്കുന്നതിന്റെ ഭാഗമായിട്ടാണ് അളക്കല്‍ തുടങ്ങിയിട്ടുള്ളത്.
സ്ഥലം കണ്ടെത്തിയാല്‍ ജങ്ഷനിലെ ടാക്‌സി സ്റ്റാന്റ് മാറ്റി സ്ഥാപിക്കാനുള്ള പദ്ധതിയുണ്ടെന്ന് ഗ്രാമപഞ്ചായത്ത് പ്രസിഡന്റ് വി.പി.എനാസര്‍ പറഞ്ഞു. പുറമ്പോക്ക് ഭൂമി പരമാവധി പ്രയോജനപ്പെടുത്തി വിവിധ ആവശ്യങ്ങള്‍ക്ക് ഉപയോഗിക്കാനാണ് ഗ്രാമപഞ്ചായത്ത് ലക്ഷ്യമിടുന്നത്.
       വര്‍ഷങ്ങളായിട്ട് പാട്ടം അടക്കാതെ പുറമ്പോക്ക് കൈവശം വച്ച് പോരുന്നുണ്ട്. ഏറ്റെടുക്കാത്ത ഭൂമിയില്‍ നിന്ന് പാട്ടം പിരിച്ചെടുത്ത് വരുമാനം കണ്ടെത്താനുള്ള മാര്‍ഗം കൂടി ലക്ഷ്യമിടുന്നുണ്ട്.
  പുഴയോരങ്ങളിലാണ് വന്‍തോതില്‍ കയ്യേറ്റം നടന്നിട്ടുള്ളത്. ചെത്തു കടവില്‍ കയ്യേറ്റം ഒഴിപ്പിച്ച് ഗ്രാമപഞ്ചായത്ത് മൈതാനം ഒരുക്കിയിട്ടുണ്ട്. കയ്യേറ്റം ഒഴിപ്പിക്കുന്നതിലൂടെ വളരെയധികം ഭൂമി ഗ്രാമപഞ്ചായത്തിന്റെ ഉടമസ്ഥതയില്‍ വരും.
         കാളികാവ് ഗ്രാമ പഞ്ചായത്ത് പ്രസിഡന്റ് വി.പി.എ നാസര്‍, വില്ലേജ് ഓഫിസര്‍ സി അബ്ദുല്‍ റഷീദ്, ജീവനക്കാരായ സുനില്‍കുമാര്‍, ബിനേഷ്, സുരേഷ് തുടങ്ങിയവരുടെ നേതൃത്വത്തിലാണ് പുറമ്പോക്ക് ഭൂമി അളവ് നടന്നത്. പഴയ പാലത്തിനു സമീപം ചൊവ്വാഴ്ച അളവു പൂര്‍ത്തിയാക്കി. വില്ലേജില്‍ നിന്ന് രേഖകള്‍ കൈമാറ്റത്തിനുസരിച്ച് ടാക്‌സി സ്റ്റാന്റ് നിര്‍മാണ പ്രവര്‍ത്തനം ആരംഭിക്കുമെന്ന് വി.പി.എ നാസര്‍ പറഞ്ഞു.