പേരാമ്പ്ര: 22 കോടി രൂപ വകയിരുത്തി കുറ്റ്യാടി ജലസേചന പദ്ധതിയില്‍ നടപ്പാക്കുന്ന നവീകരണ പ്രവൃത്തിയുടെ ഭാഗമായി റീ ടാര്‍ ചെയ്തു നന്നാക്കിയ റോഡുകള്‍ വെട്ടിപ്പൊളിക്കുന്നു.
 പെരുവണ്ണാമൂഴി ഭാഗത്തെ റോഡുകളാണ് പൊളിക്കുന്നത്. ഡാം വൃഷ്ടിപ്രദേശത്തെ വൈദ്യുതി ലൈനുകള്‍ മാറ്റി അണ്ടര്‍ഗ്രൗണ്ട് കേബിള്‍ സംവിധാനം ഏര്‍പ്പെടുത്താനാണ് റോഡുകള്‍ വെട്ടിപ്പൊളിക്കുന്നത്. വര്‍ഷങ്ങളായി പൊട്ടിപ്പൊളിഞ്ഞു കിടന്ന റോഡുകള്‍ ലോക ബാങ്ക് ഫണ്ടുപയോഗിച്ച് നവീകരിച്ച് റീടാര്‍ ചെയ്തിരുന്നു. എന്നാല്‍ നവീകരിച്ച റോഡിലൂടെ വാഹനങ്ങള്‍ ഓടിത്തുടങ്ങുമ്പോള്‍ തന്നെ റോഡുകള്‍ പൊളിച്ചുമാറ്റുന്നത് പ്രദേശവാസികളില്‍ അമര്‍ഷമുണ്ടാക്കിയിട്ടുണ്ട്. കഴിഞ്ഞ ദിവസം മണ്ണുമാന്തി യന്ത്രം ഉപയോഗിച്ചാണ് റീ ടാര്‍ ചെയ്ത ഭാഗങ്ങള്‍ പൊളിക്കാന്‍ തുടങ്ങിയത്.  എന്നാല്‍ ഒരുഭാഗത്ത് പൊളിക്കുമ്പോഴും മറുഭാഗത്ത് റോഡ് റീ ടാറിങ് നടത്തിക്കൊണ്ടിരിക്കുകയുമാണ്. നേരത്തെ കേബിള്‍ വര്‍ക്കിനുള്ള പദ്ധതി തയാറാക്കി സമര്‍പ്പിച്ചെങ്കിലും ഇപ്പോഴാണ് പാസായതെന്നാണ് ജലസേചന വകുപ്പ് അധികൃതര്‍ പറയുന്നത്. പൊളിക്കുന്ന റോഡുകള്‍ വീണ്ടും നന്നാക്കുമെന്നു പറയുന്നുണ്ടെങ്കിലും ഇതിനുള്ള ഫണ്ടിനെക്കുറിച്ച് അധികൃതര്‍ക്ക് വ്യക്തമായ മറുപടിയില്ല.