ബാഴ്‌സലോണ: കൈ നിറയെ ഗോളുമായി ബാഴ്‌സലോണ ലാലിഗ സീസണ്‍ പൂര്‍ത്തിയാക്കി. ഇന്നലെ നടന്ന ലീഗിലെ അവസാന മത്സരത്തില്‍ എതിരില്ലാത്ത അഞ്ച് ഗോളിന് അലാവസിനെയാണ് ബാഴ്‌സലോണ തകര്‍ത്തത്. മികച്ച പ്രകടനം പുറത്തെടുത്ത ബാഴ്‌സലോണ അര്‍ഹിച്ച ജയം തന്നെയായിരുന്നു. 

ബാക്ക്‌നിരയില്‍ പിക്വെ ഇല്ലാതെയായിരുന്നു ബാഴ്‌സലോണ ഇറങ്ങിയത്. ജോദ്രി അലാബ, ലിങ്‌ലെറ്റ്, റൊണാള്‍ഡ് അറോഹു,സെര്‍ജി റോബര്‍ട്ടോഎന്നിവരായിരുന്നു ആദ്യ ഇലവനില്‍ ബാക്ക്‌നിരയില്‍ ഉണ്ടായിരുന്നത്. 24ാം മിനുട്ടില്‍ അന്‍സു ഫാത്തിയാണ് ബാഴ്‌സയുടെ ആദ്യ ഗോള്‍ നേടിയത്. 

34, 75 മിനുട്ടുകളില്‍ മെസ്സിയും ഗോള്‍ നേടി. മെസ്സി ഒരു അസിസ്റ്റും സ്വന്തമാക്കി. ലൂയീസ് സുവാരസ് (44), നെല്‍സണ്‍ സെമേദോ (57) എന്നിവരാണ് ബാഴ്‌സലോണക്ക് വേണ്ടി ഗോള്‍ നേടിയ മറ്റുതാരങ്ങള്‍. 

ടോട്ടനത്തിന് ജയം

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ ടോട്ടനത്തിന് ജയം. ഇന്നലെ നടന്ന മത്സരത്തില്‍ എതിരില്ലാത്ത മൂന്ന് ഗോളിന് ലെസ്റ്റര്‍ സിറ്റിയേയാണ് ടോട്ടനം തകര്‍ത്തത്. ആറാം മിനുട്ടില്‍ ലഭിച്ച സെല്‍ഫ് ഗോളില്‍ ടോട്ടനം മുന്നിലെത്തി. 37, 40 മിനുട്ടുകളില്‍ നായകന്‍ ഹാരി കെയ്ന്‍ ഇരട്ട ഗോളും ടോട്ടനത്തിന് വേണ്ടി സ്വന്തമാക്കി. ഇതോടെ 37 മത്സരത്തില്‍ നിന്ന് 58 പോയിന്റുള്ള ടോട്ടനം ആറാം സ്ഥാനത്തായി.