കോഴിക്കോട്: വിദ്യാര്‍ഥിയെ നിരന്തരം ശല്യം ചെയ്ത യുവാവ് അറസ്റ്റില്‍. മൂഴിക്കല്‍ കട്ടയാട്ട്പറമ്പ് ആബ വില്ലയില്‍ വിവ്യന്‍ ആന്റണി (22) യെയാണ് ചേവായൂര്‍ പൊലിസ് അറസ്റ്റ് ചെയ്തത്.
പോക്‌സോ നിയമ പ്രകാരം കേസെടുത്ത് കോടതിയില്‍ ഹാജരാക്കിയ പ്രതിയെ കോടതി റിമാന്‍ഡ് ചെയ്തു. അയല്‍വാസിയായ വിദ്യാര്‍ഥിയുടെ പരാതിയിലാണ് അറസ്റ്റ്. വിദ്യാര്‍ഥിയെ നിരന്തരം ശല്യം ചെയ്യുകയും വീട്ടില്‍ വന്ന് ജനലില്‍ മുട്ടുക, വീടിന് നേരെ കല്ലെറിയുക തുടങ്ങിയ അക്രമണം തുടരുകയായിരുന്നു. മാസങ്ങള്‍ക്ക് മുന്‍പ് വീടിനു നേരെ കല്ലെറിഞ്ഞതിനെ തുടര്‍ന്ന് സുപ്രഭാതം ലേഖകനായ സലീം മൂഴിക്കല്‍ അടക്കമുള്ളവര്‍ ഇയാളെ ചോദ്യം ചെയ്തിരുന്നു. ഇതേ തുടര്‍ന്ന് ഇയാളും മറ്റു മൂന്നുപേരും ചേര്‍ന്ന് സലീം മൂഴിക്കലിനെ തലക്ക് അടിച്ച് പരുക്കേല്‍പ്പിക്കുകയും സലീമിന് ഗുരുതര പരുക്കേല്‍ക്കുകയും ചെയ്തിരുന്നു. ഈ കേസില്‍ അറസ്റ്റിലായ പ്രതി 14 ദിവസത്തെ ജയില്‍വാസത്തിന് ശേഷം കുറച്ച് ദിവസം മുന്‍പാണ് ജാമ്യത്തിലിറങ്ങിയത്.
ചൊവാഴ്ച പെണ്‍കുട്ടി പഠിക്കുന്ന സ്‌കൂളിന് സമീപമെത്തിയ പ്രതി കുട്ടിയെ കൈകാട്ടി വിളിക്കുകയും ബൈക്കില്‍ കയറാന്‍ ആവശ്യപ്പെടുകയും ആയിരുന്നു. ഇതേ തുടര്‍ന്ന് പെണ്‍കുട്ടി ചേവായൂര്‍ സ്റ്റേഷനില്‍ നല്‍കിയ പരാതിയെ തുടര്‍ന്ന് പ്രതിയെ സ്റ്റേഷനില്‍ വിളിപ്പിക്കുകയായിരുന്നു. അറസ്റ്റ് രേഖപ്പെടുത്തുന്നതിന് തൊട്ടുമുന്‍പ് ഓടി രക്ഷപ്പെടാന്‍ ശ്രമിച്ചെങ്കിലും പൊലിസ് സാഹസികമായി ഇയാളെ ലോ കോളജിന് സമീപമുള്ള കെട്ടിടത്തില്‍ നിന്ന് പിടികൂടി.