കോഴിക്കോട്: മനുഷ്യനെ സത്യപാന്താവിലേക്ക് നയിക്കുക ആത്മീയ വിദ്യാഭ്യാസമാണെന്നും നേരായ അറിവിലൂടെ മാത്രമേ അന്തിമ വിജയം നേടാനാവുകയുള്ളൂവെന്നും സമസ്ത കേന്ദ്ര മുശാവറ അംഗം ഉമര്‍ ഫൈസി മുക്കം. 'നേരറിവ് നല്ല നാളേക്ക് ' പ്രമേയത്തില്‍ സമസ്ത കേരള ജംഇയ്യത്തുല്‍ മുഅല്ലിമീന്‍ സംസ്ഥാന കമ്മിറ്റി നടത്തുന്ന മിഹ്‌റജാനുല്‍ ബിദായ കാംപയിന്റെ ജില്ലാതല ഉദ്ഘാടനം നിര്‍വഹിച്ചു സംസാരിക്കുകയായിരുന്നു അദ്ദേഹം. സമൂഹം തീവ്രവാദത്തിലേക്ക് നുഴഞ്ഞു കയറാതിരിക്കണമെങ്കില്‍ സച്ചരിതരായ മഹാന്മാരുടെ പാത പിന്‍പറ്റി ജീവിക്കുന്നതിനുതകുന്ന വിദ്യാഭ്യാസം ഇളംതലമുറയ്ക്ക് മുറപോലെ നല്‍കാന്‍ എല്ലാവരും തയാറാകണമെന്നും അദ്ദേഹം കൂട്ടിച്ചേര്‍ത്തു.
കളന്‍തോട് നജാത്തുല്‍ ഇസ്‌ലാം മദ്‌റസയില്‍ നടന്ന ചടങ്ങില്‍ എസ്.കെ.ജെ.എം ജില്ലാ സെക്രട്ടറി പി. ഹസൈനാര്‍ ഫൈസി അധ്യക്ഷനായി. പി. സാജിദ് ഫൈസി മലയമ്മ പ്രമേയ പ്രഭാഷണം നടത്തി. ബീരാന്‍ ഹാജി, സ്വാലിഹ് ഹുദവി, അസീസ് സഖാഫി, യൂസുഫ് ഫൈസി, മുഹമ്മദ് ഹാജി, ലുഖ്മാന്‍ തങ്ങള്‍, ഹാമിസുല്‍ ഫുആദ് വെള്ളിമാട്കുന്ന്, ശഫീഖ് വാഫി, അബ്ദുല്ല മാസ്റ്റര്‍, അബ്ദുല്‍ അസീസ് മുസ്‌ലിയാര്‍ സംസാരിച്ചു. അശ്‌റഫ് ദാരിമി കളന്‍തോട് സ്വാഗതവും ശാഫി അശ്അരി നന്ദിയും പറഞ്ഞു.