ചെന്നൈ: തമിഴ്‌നാട്ടില്‍ രാജ്ഭവനിലെ 84 ജീവനക്കാര്‍ക്ക് കൊവിഡ് സ്ഥിരീകരിച്ചു. അഗ്‌നിശമന സേനയിലെയടക്കം സുരക്ഷാ ഉദ്യോഗസ്ഥര്‍ക്കാണ് രോഗം സ്ഥിരീകരിച്ചിരിക്കുന്നത്. എന്നാല്‍, ഇവരാരും ഗവര്‍ണര്‍ ഭന്‍വാരിലാല്‍ പുരോഹിതുമായോ ഉയര്‍ന്ന ഉദ്യോഗസ്ഥരുമായോ നേരിട്ട് സമ്പര്‍ക്കം പുലര്‍ത്തിയിട്ടില്ലെന്നാണ് വിവരം.
രാജ്ഭവനിലെ ചില ജീവനക്കാര്‍ക്ക് രോഗലക്ഷണങ്ങളുണ്ടായതിനെ തുടര്‍ന്ന് 147 പേരെ പരിശോധനയ്ക്കു വിധേയമാക്കുകയായിരുന്നു. ഇതില്‍ 84 പേര്‍ക്കാണ് രോഗം സ്ഥിരീകരിച്ചത്. ഇവരാരും രാജ്ഭവന്റെ പ്രധാന കെട്ടിടത്തില്‍ പ്രവേശിച്ചിരുന്നില്ലെന്നാണ് സര്‍ക്കാര്‍ വ്യക്തമാക്കുന്നത്. സംഭവത്തെ തുടര്‍ന്ന് രാജ്ഭവനിലെ എല്ലാ കെട്ടിടങ്ങളും അണുനശീകരണം നടത്തി ശുദ്ധീകരിച്ചു.
അതേസമയം, ബിഹാറില്‍ ക്രിക്കറ്റ് മത്സരത്തില്‍ പങ്കെടുത്ത എം.എല്‍.എയ്‌ക്കെതിരേ ലോക്ക്ഡൗണ്‍ ലംഘനത്തിന് കേസെടുത്തു. ബ്രഹ്മപൂരില്‍നിന്നുള്ള ആര്‍.ജെ.ഡി എം.എല്‍.എയായ ശംഭുനാഥ് യാദവിനെതിരേയാണ് കേസ്. ക്രിക്കറ്റ് ടൂര്‍ണമെന്റില്‍ മുഖ്യാതിഥിയായാണ് അദ്ദേഹം പങ്കെടുത്തിരുന്നത്.