വിദ്യാനഗര്‍: പൊലിസിന്റെ അനാസ്ഥക്കും ഗുണ്ടാ അക്രമത്തിനുമെതിരേ നീതി തേടി അംഗ പരിമിതനും കുടുംബവും കലക്ടറേറ്റിനു മുന്നില്‍ അനിശ്ചിതകാല സമരം തുടങ്ങി. ചട്ടഞ്ചാല്‍ പള്ളത്തുങ്കാലിലെ മൊയ്തീന്‍ ബാവ, ഭാര്യ ഹലീമയും പെണ്‍മക്കളുമടങ്ങിയ കുടുംബത്തോടൊപ്പമാണ് അനിശ്ചിതകാല നിരാഹാര സമരം തുടങ്ങിയത്.
ചട്ടഞ്ചാല്‍ വില്ലേജിലുള്ള 10 സെന്റ് സ്ഥലവും റോഡിനായുള്ള അഞ്ച് സെന്റ് സ്ഥലവും ഇവര്‍ 1993ല്‍ വിലയ്ക്കു വാങ്ങിയിരുന്നുവത്രെ. ഇതിന്റെ നികുതി അടച്ചു വന്നിരുന്നു. എന്നാല്‍ ചട്ടഞ്ചാലിലെ ഒരു സ്വകാര്യ വ്യക്തിക്കു വേണ്ടി വില്ലേജ് ഓഫിസറുടെ ഒത്താശയോടെ വ്യാജ ആധാരമുണ്ടാക്കി സ്ഥലം കൈവശപ്പെടുത്തുകയും തന്നെയും കുടുംബത്തേയും കുടിയിറക്കുകയും മതില്‍ കെട്ടി സ്ഥലം കൈവശപ്പെടുത്തുകയുമായിരുന്നുവെന്ന് മൊയ്തീന്‍ ബാവ ആരോപിച്ചു. ഇതു സംബന്ധിച്ച് വിദ്യാനഗര്‍ പൊലിസില്‍ നിരന്തരം പരാതി നല്‍കിയെങ്കിലും പൊലിസ് തന്റെയും കുടുംബത്തിന്റെയും പേരില്‍ കേസ് രജിസ്റ്റര്‍ ചെയ്യുകയും സ്റ്റേഷനില്‍ വിളിപ്പിച്ച് പീഡിപ്പിക്കുകയും ചെയ്യുകയായിരുന്നുവെന്നും പരാതിപ്പെട്ടു.
ബി.കോം വിദ്യാര്‍ഥിയായ മകനെ സ്ഥലം കൈയേറിയ വ്യക്തിയുടെ നേതൃത്വത്തില്‍ കുത്തിപ്പരുക്കേല്‍പിച്ച സംഭവത്തില്‍ കേസെടുക്കാതെ വാദിയെ പ്രതിയാക്കുകയായിരുന്നുവത്രെ. ഇതില്‍ പ്രതിഷേധിച്ചാണ് അനിശ്ചിതകാല സമരം നടത്തുന്നതെന്ന് ഇവര്‍ പറയുന്നു.