ദുബൈ: യു.എ.ഇയിൽ ഇന്നും (ബുധനാഴ്ച) കനത്ത വേനൽച്ചൂട് തുടരുമെന്ന് ദേശീയ കാലാവസ്ഥാ കേന്ദ്രം (NCM) അറിയിച്ചു. രാജ്യത്തിന്റെ ചില ഭാഗങ്ങളിൽ താപനില 47 ഡിഗ്രി സെൽഷ്യസ് വരെ ഉയരുമെന്നും കിഴക്കൻ, തെക്കൻ മേഖലകളിൽ സംവഹന മേഘങ്ങൾ (Convective Clouds) രൂപപ്പെട്ട് ഒറ്റപ്പെട്ട മഴയ്ക്ക് സാധ്യതയുണ്ടെന്നും മുന്നറിയിപ്പുണ്ട്.

ഇന്ന് പൊതുവേ ഭാഗികമായി മേഘാവൃതമായ കാലാവസ്ഥയായിരിക്കും. ഉച്ചയ്ക്ക് ശേഷമാകുമ്പോൾ ചൂട് വർധിക്കുകയും കിഴക്കൻ, തെക്കൻ മേഖലകളിൽ മഴമേഘങ്ങൾ രൂപപ്പെടാൻ സാധ്യതയുണ്ടെന്നും അധികൃതർ അറിയിച്ചു.

തെക്കുകിഴക്കൻ, വടക്കുകിഴക്കൻ ദിശകളിൽ നിന്ന് മണിക്കൂറിൽ 10 മുതൽ 25 കിലോമീറ്റർ വരെ വേഗത്തിൽ കാറ്റ് വീശും. ചില സമയങ്ങളിൽ കാറ്റിന്റെ വേഗം 40 കിലോമീറ്റർ വരെ ഉയരാനിടയുള്ളതിനാൽ പ്രത്യേകിച്ച് തെക്കൻ മേഖലകളിൽ പൊടിക്കാറ്റിന് സാധ്യതയുണ്ട്.

റാസ് അൽ ഖൈമയിലും ലിവയിലും ഇന്ന് രാജ്യത്തെ ഏറ്റവും ഉയർന്ന താപനിലയായ 47°C രേഖപ്പെടുത്തുമെന്നാണ് പ്രവചനം. അബൂദബി, ദുബൈ, ഷാർജ, ഉമ്മുൽ ഖുവൈൻ, അൽ ഐൻ എന്നിവിടങ്ങളിൽ 45°C വരെ ഉയരും. അജ്‌മാൻ, അൽ റുവൈസ്, അൽ സില എന്നിവിടങ്ങളിൽ 42°C, ദൽമയിൽ 41°C, ഫുജൈറയിൽ 39°C വരെ താപനില ഉയരുമെന്നാണ് പ്രതീക്ഷ.

അറേബ്യൻ ഗൾഫിലും ഒമാൻ കടലിലും കടൽ പൊതുവേ ശാന്തമോ മിതമായ തിരമാലകളോടെയോ ആയിരിക്കും.

അതേസമയം, വ്യാഴാഴ്ചയും കിഴക്കൻ, തെക്കൻ മേഖലകളിൽ സംവഹന മേഘങ്ങൾ രൂപപ്പെട്ട് മഴ ലഭിക്കാൻ സാധ്യതയുണ്ടെന്ന് NCM അറിയിച്ചു. മണിക്കൂറിൽ 40 കിലോമീറ്റർ വരെ വേഗത്തിൽ കാറ്റ് വീശുകയും തുറസ്സായ പ്രദേശങ്ങളിൽ പൊടിക്കാറ്റ് അനുഭവപ്പെടുകയും ചെയ്യും.

വെള്ളിയാഴ്ചയും ഭാഗികമായി മേഘാവൃതമായ കാലാവസ്ഥ തുടരും. കിഴക്കൻ, തെക്കൻ മേഖലകളിൽ വീണ്ടും മഴമേഘങ്ങൾ രൂപപ്പെടാൻ സാധ്യതയുണ്ട്. ശനിയാഴ്ച പൊതുവേ തെളിഞ്ഞതോ ഭാഗികമായി മേഘാവൃതമോ ആയ കാലാവസ്ഥ പ്രതീക്ഷിക്കുന്നുവെങ്കിലും കിഴക്കൻ, തെക്കൻ മേഖലകളിൽ ഉച്ചയ്ക്ക് ശേഷം മഴമേഘങ്ങൾ രൂപപ്പെടാൻ സാധ്യത നിലനിൽക്കുന്നു. ഞായറാഴ്ച പുലർച്ചെയോടെ ചില തീരപ്രദേശങ്ങളിൽ ഈർപ്പനില വീണ്ടും ഉയരാനും സാധ്യതയുണ്ടെന്ന് കാലാവസ്ഥാ കേന്ദ്രം അറിയിച്ചു.

English Summary: UAE will experience hot weather on Wednesday with temperatures reaching up to 47°C in Ras Al Khaimah and Liwa. Convective clouds may bring rain to eastern and southern regions, while strong winds could cause blowing dust. Similar weather, including chances of rain, is expected through Friday before conditions become generally fair on Saturday.