കാസര്‍കോട്: സിവില്‍ സ്റ്റേഷനില്‍ പ്രവര്‍ത്തിക്കുന്ന ഓഫിസുകളും പരിസരങ്ങളും മാലിന്യമുക്തമാക്കി ഹരിതവല്‍ക്കരിക്കുന്നു. മാലിന്യം കുറയ്ക്കുന്നതിന്റെ ഭാഗമായി കലക്ടറേറ്റ് കോംപൗണ്ടില്‍ നടക്കുന്ന എല്ലാ പരിപാടികള്‍ക്കും സ്റ്റീല്‍ ഗ്ലാസ്സും പ്ലേറ്റുകളുമാണ് ഉപയോഗിക്കുക. ഡിസ്‌പോസിബിള്‍, പേപ്പര്‍ ഗ്ലാസ്സുകളും കുപ്പിവെള്ളവും പൂര്‍ണമായും ഒഴിവാക്കും. ഫ്‌ളക്‌സ് ഒഴിവാക്കി തുണികൊണ്ടുള്ള ബാനര്‍ ഉപയോഗിക്കും. ഉച്ച ഭക്ഷണവും മറ്റും പാര്‍സല്‍ വാങ്ങുകയാണെങ്കില്‍ പ്ലാസ്റ്റിക് കവറുകള്‍ ഒഴിവാക്കും.
സമ്പൂര്‍ണ ഹരിത പെരുമാറ്റച്ചട്ടം നടപ്പാക്കുന്നതിന്റെ ഭാഗമായി പ്രകൃതി സൗഹൃദ വസ്തുക്കളായിരിക്കും ഓരോ പരിപാടിക്കും ഉപയോഗിക്കുക. ഓഫിസുകളില്‍ പ്ലാസ്റ്റിക് നിര്‍മിത സാധനങ്ങള്‍ കൊണ്ടുവരുന്നത് ഒഴിവാക്കും. നിര്‍ബന്ധിത സാഹചര്യത്തില്‍ കൊണ്ടുവരുന്ന പ്ലാസ്റ്റിക്കുകളും മറ്റും കലക്ടറേറ്റ് കോമ്പൗണ്ടില്‍ ഉപേക്ഷിക്കാതെ തിരികെ കൊണ്ടുപോകാനുളള നടപടികള്‍ കൈക്കൊള്ളുമെന്ന് ജില്ലാ കലക്ടര്‍ കെ ജീവന്‍ബാബു അറിയിച്ചു.