തിരുവനന്തപുരം: സ്വര്‍ണ വില ആകാശത്തോളം ഉയരത്തിലേക്ക്. ഒരു പവന് വില 38,120 രൂപയായി ഉയര്‍ന്നത് ചരിത്രത്തിലാദ്യമായാണ്. ഒരു ഗ്രാം സ്വര്‍ണത്തിന് മാത്രം 4765 രൂപയാണ് വില. ഒരു ഗ്രാമിന് 30 രൂപയാണ് വര്‍ധിച്ചത്. പവന് 240 രൂപയും കൂടി.
ഓഹരി വിപണികളിലെ ചാഞ്ചാട്ടം നഷ്ടം കനത്തതോടെ നിക്ഷേപകര്‍ മറ്റു വഴികള്‍ തേടുകയായിരുന്നു. ഇതും വലിയ നിരയില്‍ സ്വര്‍ണത്തില്‍ നിക്ഷേപമെത്താനും വില വര്‍ധിക്കാനും കാരണമായതായി വിലയിരുത്തപ്പെടുന്നു.

ഈ വര്‍ഷം മാത്രം സ്വര്‍ണവിലയില്‍ 30ശതമാനം വര്‍ധനവാണ് രേഖപ്പെടുത്തിയത്. 2011ന് ശേഷം ഇതാദ്യമായി അന്താരാഷ്ട്ര വിപണിയില്‍ ഒരു ഔണ്‍സ് സ്വര്‍ണത്തിന്റെ വില 1,900 ഡോളറിലെത്തിയിട്ടുണ്ട്. കോവിഡ് 19 വൈറസ് ബാധയെ തുടര്‍ന്നുണ്ടായ സാമ്പത്തിക അനിശ്ചിതാവസ്ഥയാണ് സ്വര്‍ണവില ഉയരാനുള്ള പ്രധാന കാരണമായി ചൂണ്ടിക്കാണിക്കുന്നത്.