കൊച്ചി: റുപേ പ്ലാറ്റ്‌ഫോമില്‍ പ്രവര്‍ത്തിക്കുന്നതും സൈ്വപ്പ് ആവശ്യമില്ലാത്തതുമായ ക്രെഡിറ്റ് കാര്‍ഡ് റെയില്‍വേയുടെ ഐ.ആര്‍.സി.ടി.സിയും എസ്.ബി.ഐ കാര്‍ഡും ചേര്‍ന്ന് പുറത്തിറക്കി.
ഉപയോക്താക്കള്‍ക്ക് സുരക്ഷിത വിനിമയം ഉറപ്പാക്കുന്നതിന് നിയര്‍ ഫീല്‍ഡ് കമ്യൂണിക്കേഷന്‍ (എന്‍.എഫ്.സി) സാങ്കേതികവിദ്യ ഉപയോഗിച്ചാണ് പുതിയ റുപേ ക്രെഡിറ്റ് കാര്‍ഡ് പ്രവര്‍ത്തിക്കുക. ഇടപാട് നടത്തേണ്ട പി.ഒ.എസ് മെഷീനില്‍ സൈ്വപ് ചെയ്യുന്നതിന് പകരം കാര്‍ഡ് ചെറുതായി തട്ടിയാല്‍ മതി എന്നതാണ് പ്രത്യേകത.
സ്ഥിര യാത്രക്കാര്‍ക്കായി യാത്രയുടെ ദൈര്‍ഘ്യത്തിനു ആനുപാതികമായി പ്രത്യേക ആനുകൂല്യങ്ങളും ചില്ലറ ഇടപാടുകള്‍, ഭക്ഷണശാലകള്‍, വിനോദ ഉപാധികള്‍ എന്നിവിടങ്ങളില്‍ കാര്‍ഡ് ഉപയോഗിക്കുന്നവര്‍ക്ക് പ്രത്യേക ഇളവുകളും ലഭിക്കും. ഇടപാട് നിരക്കിലും ഇളവ് ഉണ്ടാകും.കാര്‍ഡ് ഉടമകള്‍ക്ക് ഐ.ആര്‍.സി.ടി.സി വെബ്‌സൈറ്റ് മുഖേന നടത്തുന്ന ഫസ്റ്റ് എ.സി, സെക്കന്‍ഡ് എ.സി, തേഡ് എ.സി, എക്‌സിക്യൂട്ടീവ് ചെയര്‍ കാര്‍, എ.സി ചെയര്‍കാര്‍ ബുക്കിങ്ങുകള്‍ക്ക് 10 ശതമാനം വരെ വാല്യൂ ബാക്കും ലഭിക്കും.ഓണ്‍ലൈന്‍ ഇടപാട് തുകയുടെ ഒരു ശതമാനം വരെ സേവനനിരക്കില്‍ കുറവുണ്ടാകും.
ഒരു ശതമാനം ഇന്ധന സര്‍ചാര്‍ജ് ഇളവും, റെയില്‍വേ സ്റ്റേഷനുകളിലെ പ്രീമിയം ലോഞ്ച് സൗകര്യം ഒരു പാദത്തില്‍ ഒരു തവണ എന്ന കണക്കില്‍ പ്രതി വര്‍ഷം നാലു തവണ സൗജന്യമായി ഉപയോഗിക്കാനും സാധിക്കും.കാര്‍ഡ് ആക്ടിവേറ്റ് ചെയ്യുമ്പോള്‍ 350 ബോണസ് റിവാര്‍ഡ് പോയിന്റ് ലഭിക്കും. ഇത് ഐ.ആര്‍.സി.ടി.സിയുടെ വെബ്‌സൈറ്റിലൂടെ നടത്തുന്ന ടിക്കറ്റ് ബുക്കിങ്ങുകളില്‍ ഉപയോഗിക്കാം. ഇ കൊമേഴ്‌സ് സൈറ്റുകളിലെ ഇടപാടുകളില്‍ കാര്‍ഡ് ഉപയോഗിച്ച് പ്രത്യേക കിഴിവ് നേടാം.