മസ്‌കറ്റ്: കോവിഡ് ബാധിച്ച് ചികിത്സയില്‍ ആയിരുന്ന 9 പേര്‍ കൂടി മരണപ്പെട്ടതോടെ ഒമാനില്‍ മരണസംഖ്യ 402 ആയി ഉയര്‍ന്നു. മരണനിരക്ക് അര ശമതമാനം ആണ്. 1559 പേര്‍ കൂടി രോഗമുക്തി നേടി. ഇതോടെ രാജ്യത്ത് രോഗമുക്തി നേടിയവരുടെ എണ്ണം 58587. പുതിയ രോഗികളുടെ എണ്ണം 28 ദിവസത്തിന് ശേഷം ആയിരത്തില്‍ കുറഞ്ഞു. പുതിയതായി കോവിഡ് സ്ഥിരീകരിച്ചത് 846 പേര്‍ക്കാണ്. ഇതോടെ മൊത്തം രോഗികളുടെ എണ്ണം 77904 ആയി.

കഴിഞ്ഞ 24 മണിക്കൂറിനുള്ളില്‍ ആകെ 1904 റെസ്റ്റുകളാണ് നടത്തിയത്.49 പേരെ കൂടി ആശുപത്രിയില്‍ പ്രവേശിച്ചു. ഐസിയുവില്‍ ഉള്ള രോഗികളുടെ എണ്ണം 181 ആയി. നിലവില്‍ 528 പേരാണ് ആശുപത്രിയില്‍ ചികിത്സയില്‍ ഉള്ളത്. രാജ്യത്ത് 18915 പേരാണ് നിലവില്‍ അസുഖബാധിതര്‍ ആയിട്ടുള്ളത്.

ജൂലൈ 25 മുതല്‍ രാജ്യവ്യാപകമായി ഏര്‍പ്പെടുത്തിയ കര്‍ശന ലോക്ക്ഡൗണ്‍ പുതിയ രോഗികളുടെ എണ്ണം കുറക്കാന്‍ സഹായകരമാകുമെന്ന് ആരോഗ്യമന്ത്രാലയത്തിലെ ഡിസീസസ് കണ്‍ട്രോള്‍ വിഭാഗം ഡയറക്ടര്‍ ജനറല്‍ ഡോക്ടര്‍ സൈഫ് അല്‍ അബ്രി ഒമാന്‍ ടെലിവിഷന് നല്‍കിയ അഭിമുഖത്തില്‍ പറഞ്ഞു.

ശനിയാഴ്ച്ച നിലവില്‍ വന്ന ലോക്ക് ഡൗണ്‍ അടുത്ത ആഗസ്റ്റ് എട്ട് വരെ നില നില്‍ക്കും. ഈ കാലയളവില്‍ രാത്രി സഞ്ചാര വിലക്ക് നിലവില്‍ വന്നു .കാല്‍ നട പോലും അനുവദനീയമല്ല. ലോക്ക് ഡൗണ്‍ നിബന്ധനകള്‍ ലംഘിക്കുന്നവരില്‍ നൂറ് റിയാലാണ് പിഴ ഈടാക്കുന്നത്.