കണ്ണൂര്‍: താന്‍ ബിജെപിയിലേക്ക് പോകില്ലെന്ന് അവകാശപ്പെട്ട് വീഡിയോ പുറത്തിറക്കിയ കണ്ണൂരിലെ യു.ഡി.എഫ് സ്ഥാനാര്‍ഥി കെ. സുധാകരനുവേണ്ടി പ്രചാരണത്തിനായി പുറത്തിറക്കിയ പരസ്യചിത്രത്തെക്കുറിച്ചും വിവാദം. സ്ത്രീസമൂഹത്തെ അവഹേളിക്കുന്നതാണ് ചിത്രമെന്നാണ് പരാതി.

പരസ്യത്തിലൂടെ ലക്ഷ്യം വയ്ക്കുന്നത് കണ്ണൂരിലെ എല്‍ഡിഎഫ് സ്ഥാനാര്‍ഥിയായ പി കെ ശ്രീമതി ടീച്ചറെയാണെന്നാണ് ഇടതുപക്ഷത്തിന്റെ ആരോപണം.
'ഓളെ പഠിപ്പിച്ച് ടീച്ചറാക്കിയത് വെറുതെയായി. ഓളെക്കൊണ്ട് ഒന്നിനും കൊള്ളൂല' എന്നാക്ഷേപിക്കുന്ന പരസ്യത്തില്‍ 'ഒരു തെറ്റ് ഏതു പൊലീസുകാരനും പറ്റു'മെന്നും 'ഇനി ഓന്‍ പോകട്ടെ. ഓന്‍ ആണ്‍കുട്ടിയാ. പോയാ കാര്യം സാധിച്ചിട്ടേ വരൂ' എന്നും പറയുന്നുണ്ട്. തുടര്‍ന്ന് കൈപ്പത്തി ചിഹ്നത്തില്‍ കെ. സുധാകരന് വോട്ട് ചെയ്തു വിജയിപ്പിക്കണമെന്ന ആഹ്വാനത്തോടെയാണ് പരസ്യ ചിത്രത്തിലുള്ളത്.

സ്ത്രീ ഒരിക്കലും മുന്‍നിരയിലേക്ക് വരരുതെന്നും അവര്‍ക്ക് നാടിനെ സേവിക്കാന്‍ കഴിയില്ലെന്നും സ്ഥാപിച്ച് ഈ പരസ്യത്തിലുടെ മനുസ്മൃതിവാദികളായ സംഘപരിവാറുകാരെക്കാള്‍ അപരിഷ്‌കൃതരാണ് തങ്ങളെന്ന് സ്വയം പ്രഖ്യാപിക്കുകയാണ് കോണ്‍ഗ്രസും യുഡിഎഫുമെന്നുമാണ് ഇടതുപക്ഷത്തിന്റെ പരാതി.
വിഷയത്തില്‍ തെരഞ്ഞെടുപ്പു കമീഷന് പരാതി നല്‍കാന്‍ ഒരുങ്ങുകയാണ്.