മനാമ: പ്രവാസി ഹാജിമാരുമായി ബന്ധപ്പെട്ട പ്രതിസന്ധികളെല്ലാം മെയ് 11ന് കേന്ദ്ര ഹജ്ജ് കമ്മിറ്റി യോഗത്തില്‍ ഉന്നയിക്കുമെന്ന് കേരള ഹജ്ജ് കമ്മിറ്റി ചെയര്‍മാന്‍ തൊടിയൂര്‍ മുഹമ്മദ്കുഞ്ഞ് മൗലവി.
ഹ്രസ്വ സന്ദര്‍ശനത്തിന് ബഹ്‌റൈനിലെത്തിയ അദ്ദേഹം സുപ്രഭാതത്തോട് സംസാരിക്കുകയായിരുന്നു. ഗള്‍ഫ് രാഷ്ട്രങ്ങളിലെ ഇന്ത്യക്കാരായ പ്രവാസികള്‍ക്ക് ഹജ്ജ് ചെയ്യാനുള്ള സൗകര്യം നിലനിര്‍ത്താന്‍ എല്ലാ ഇടപെടലുകളും രാഷ്ട്രീയ സമ്മര്‍ദങ്ങളും ഇന്ത്യന്‍ ഹജ്ജ് കമ്മിറ്റി ചെയ്യുന്നുണ്ട്. ഈ പ്രതിസന്ധി അടുത്ത യോഗത്തില്‍ പ്രധാന ചര്‍ച്ചയായിരിക്കുമെന്നും അദ്ദേഹം പറഞ്ഞു.
കേന്ദ്ര കമ്മിറ്റിയോടൊപ്പം കേരള ഹജ്ജ് കമ്മിറ്റിയും പ്രവാസികള്‍ക്കനുകൂലമായ രീതിയിലാണ് നടപടിക്രമങ്ങള്‍ പൂര്‍ത്തീകരിക്കുന്നത്.
പ്രവാസികളുടെ ജോലിയും ലീവും പരിഗണിച്ച് പാസ്‌പോര്‍ട്ടും മറ്റു രേഖകളും സമര്‍പ്പിക്കാനുള്ള സമയത്തില്‍ ഇളവും താമസവും നല്‍കിയിട്ടുണ്ട്.
യു.എ.ഇയിലെ ഹജ്ജ് ക്വാട്ട സ്വദേശികള്‍ക്ക് മാത്രമായി പരിമിതപ്പെടുത്തണമെന്ന ഔഖാഫിന്റെ നിര്‍ദേശം സഊദി സ്വദേശിവത്കരണവുമായി ബന്ധപ്പെട്ട് ചില മുഫ്തിമാര്‍ നല്‍കിയ നിര്‍ദേശങ്ങളുടെ ഫലമാണ്.
അങ്ങനെയെങ്കില്‍ സഊദിയിലുള്ള പ്രവാസികള്‍ക്കാര്‍ക്കും ഹജ്ജ് ചെയ്യാന്‍ പറ്റില്ലെന്ന നിര്‍ദേശവും വൈകാതെ ഉന്നയിക്കപ്പെട്ടേക്കും. ഹജ്ജിന് ആരും പോകുന്നതല്ല. അല്ലാഹുവിന്റെ വിളിക്കുത്തരം ചെയ്യുന്ന ആരാധനാ കര്‍മമാണത്. അതിനെതിരായ നീക്കങ്ങളൊന്നും സ്ഥായിയായി നിലനില്‍ക്കുകയില്ലെന്നും അദ്ദേഹം അഭിപ്രായപ്പെട്ടു.
ലോക രാഷ്ട്രങ്ങളെല്ലാം തങ്ങള്‍ക്ക് അനുവദിക്കപ്പെടുന്ന ഹജ്ജ് ക്വാട്ട സ്വദേശി വിദേശി വിവേചനമില്ലാതെ വിശ്വാസികള്‍ക്കെല്ലാവര്‍ക്കും തുല്യമായി നല്‍കണമെന്നും പ്രവാസികളെ മാത്രമായി മാറ്റി നിര്‍ത്തരുതെന്നും അദ്ദേഹം അഭ്യര്‍ഥിച്ചു.